Pravica ud ljudi i živali

Zapisal: Josip Orlando Hrvatin

Nikomadnje potlje dažja su se si zmutili, za sin sega zmišali. Stajaju se prvo sunca kako da greju delat ma ne. Jeni su uprtili rucake, niki zeli borše, pletene košiće, a niki i trogu. Urdinali su gospodinjan da njin donesu fruštik u goru, kako da su kosci. Saki za pason nosi kosir, ali mršán, za nožiće da se ni ne govori. Pohajaju ud graje do graje, ud grma do grma, ubahajaju okoli ceri, bukav, bori i grabrići, mastíju travu oštrícu z nogámi, gledaju natla proti zemlji i jišću.

Medvidi, srne, zeci, lesice, hori, šojke i božji petešići mrmráju, zmišani su i prestrašeni. Složili su se da saki ud njih dobro otpre oči, sprid i udzad, napetne ušesa i merka. Jedan mićikin zečić se počese udzad ušes i potiho spićiva srnicu ko zna ča se dogaja. Rekla mu je da neka raje pita divjega prasca, njega da put nanese ud slovenskega Snižnika do Lovranske drage i dalje do Sisola zgora Mošćenic, on da će morda znat ča povidat.

Nu, on je jimil nike novice da je u marunove gore halúj, da se ni mogal na mir najist, lego da je moral saki čas bit parićan bižat ud unih stvori na dvi noge.

“Pa ča su delali?”- ga radovedno pita zečić.

“Ej, jeni pobiraju gube, a uni drugi marune” – mu kratko udgovori divji prasac i još doda:

“Jenih i drugih prihaja saki dan već, šušnjaju, vrišću, rasajaju, karaju se, tiraju jeni druge. U nedilju san bil na jedan vršić, sprignjen poli grabrići i pošljušal. Udzdola z dolinčice mi hmalin vetar donese fanj smrdljiv dih, pa čujen dva glasa, pogovaraju se dva stvora na dvi noge. Jedan starčić zas hrbalju u ruke stoji i govori: “Čovek moj, ne znan otkuda ste, ma to je moja šuma, ne zimajte mi ti maruní”. Uvi drugi ki je jušto tretu vriću vežival vrgal je proti njemu kamičinu, znel z pasa jenu nožinu i zakričal temu čigova je gora: “Šta je tvoje, majku ti …” i  zagrozil mu se je da će ga z nožon.

Vas san se nahrhuril da mi je saka šćetina stala u viške. To i drugo ča san čul, mi prasci ne bimo nikada, nikadare, sprerekli ni zučitali jedan drugemu. Pomislil san si: “boh moj dragi, ča je prišlo na uvi svit, kakove to susede jimamo mi divji prasci?” – i pomalo, korak po korak da jako ne šušnja se štiknil nazda i san se pobral ća. Uvo ni pitan svit i već ne gren tamo, bolje lačan lego mrtav, još ti stvori jimaju jutu nan ča zamirit.

Priko Lísinske ceste san prepasal proti Brgudu. Ogorélac i Svinjaríja su mi najdraže loge. Ja, ma brinjovka mi je donesla glas da je i tamo haluj.

Zečić je sel na zadnje noge i se prpravil na novu pravicu.

“Ja, sinak moj dragi” – govori prasac zečiću – “ma ni tamo mi uni hudići nisu dali mira, opet uni dvinožni z košići i rucaki, halamástiju ti ga gori – doli i kričiju: “uva je moja, aj kako je lipa, da nisi pobrál uve desno, ja san jih prvi vidil, žena áhtaj, zanesi uve do auta doklje ja dalje pobiran. Zagrozi se unemu z live strani: “Ti  talamban, da ne biš pobiral une moje, mogal biš slabo pasat, jur znaš ča nas je tukalo, već puno cajta niman plaće, dica su mi lačna” i tako naprit.

“Ja,dragi stric prasac, ni van bilo lahko pošljušat, ma ja jih razumin, aš ko su njin dičica lačna moru se i karat, ča ne?” – pita mićikin duguhac.

“Viš kako si bistar, ti šegavac, ti” – ga je pohvalil i pogladil po glavici med ušesa.

“A ča je potlje bilo?” – spićiva dalje zečić.

“Ej ča, utpravil san se put Žijan, zdola Cerovice san našal malo mira, pohrustal par žiri, pojil nike črve i korenike i put pod noge da gren zaspat u unu moju logu ku Žijanci zovu Draga porkula. Okoli mene su tudi mladi, uvoletni praščići. Za kratko vrime je niča zašušnjalo, zamuknen, dan mot praščićon da finiju njerit, zdignen glavu i ušesa, nos san ubrnjal livo pa desno. Ja, vetar mi je i uvi put opet donesal niča smrdljivega, moj nos me još ni zdal. Na livo smo zagledali jenega dvinožnega, spušća se po putu, čemrdi i joče. Ma jako, kot da jima náduhu, mužak je, njih još nis čul jokat, rasájat ja. Joče i sam sebi govori: “Ajoj meni, jadan ja, mila majko moja, gdje sam?” Pustil san tega joha da pasa, šal pomalo za njin, čepnil udzat brinja i čul da se z nikín pogovara. Tega drugega poznan, vidil san ga da z konjon zahája po drva. Doznan da je zgubljenac pustil auto u Brgud, šal jiskat gube i prišal do prid Žijan. Ja san bil fuć. Viš do kuda ga je vrah donesal, stran duše i krsta. Granjka šiba materi zas takovin utrokon! Takovega ča još nijena žival ni storila, je tako, zečić?

“Je, ja, se ti verjen” – govori on prascu i pita ga da zač se trese. On mu udgovori da njigove muke još nisu finile. Na te besede su prišle bliže srnice, seničice, jazbaci i veverice, ki su do sada bili malo dalje i napetnjenih ušes pošljušali dalje:

“U žijanske njive je ustala nika ripa, frmenta i korauda. Jušto kada san si jih skopal zas trupcon, čujen niko havkanje “hav,hav,hav”, pomislin da ki brek tira nikega zečićovega žensota, ma ne, lego uni dvinošci, ubučeni u zeleno, zas zelenimi klabuki, kričiju, sako malo zagrmi kako da je borba. Bilo jih je već lego sih nas kada se kot čreda utpravimo na marunadu. Ma mi mučimo, rujemo i jimo, a oni se dozivaju da cela gora odumiva ud Žijan do Šije, ne pustiju spat ni une soje u selo ki su kasno zaspali.” Na to je prasac pljuknil na zemlju.

“A ča ću, šegaviji popušća (magari je moj pokojni nono, boh mu daj mir počivat, govoril da zato munjeni na svit uživaju). Jezan i da ne bin klel, san šal dalje priko Golopusta i puta za Sveti Paval, proti Trsteniku, na slovensko. Tamo je moja najmirníja loga. Na mir san raskopal okoli brinji i smrikvic, gutnil friške vode u kalić i zadrimal. Tamo kadi jimaš mir, moj sinak, ni čendže ti ne pačiju.”

“Blažen mir kadigot je”, je rekal pametan zečić, a živali udgovorile:

“Ala blažen, blažen.”

Tumač besed:  nikomadnje = nedavno, mrmráju = mrmljaju, troga = koš, jutu = razlog, izlika, haluj = strka, hmalin = uskoro, hrbalja = pastirska palica, halamastiju = bezobzirno gaze, talamban = dripac, čemrdi se = mršti se, rasajat = vikati, derati se, korauda = koraba, čendže = stjenice