Kako je bivalo nigda hodit va školu va Vrbniku

Piše:  Marija Trinajstić Božić

     Kako da je bilo čera, kada smo mi dvi divojčice i trinajst halašić partili va pervi razred. Šli smo od Place zgoru stelbun va školu, a poseli su nas va  on dolnji menji razred. Smo l bili koliko god zdrehnjeni, ne spominjan se, al se spominjan da nas je na klupi sekoga čekal beli škartočić peln malih bonbonić seke sorti koluri. Samol tajsti dan je bil s nami moj denešnji sused, mešter Pere Morožin. Ondat nan je kraće vrime školu imela jedna mlada, bela meštrica ka se je zvala Ruža Pajalić. Morda je se drugi i ne pamete toliko, ma ja ši, aš je nas nikoliko stirala z razreda ven kada smo se dvizali od svojih mest i  gjedali kojsto to novo slovo učimo. Tih let va školi smo bili, če bi se denes reklo „u kombinaciji“. Tako da smo moji  premci i ja, sve mlaje razredi bili skupa z leto starijimi al leto mlajimi aš su bivali skupa pervi i drugi i treći i četerti razred. Šenpre su  jedni  imeli „tihi rad“ i delali čegod namuče.

     Nikako pod kraj pervoga razreda prišla nan je nova meštrica znahorjivoga prezimena i imena, Miš Bernarda. Nju vajda baš zbog toga  pametimo svi. Bila je nevisoka, imela černe oči i vlasi, vavik na smih i niš je se nismo bali. Va trećen i četerton razredu meštrica nan je bila Olga Polonijo, ka nas je vavik mirila i bila nan kako mat.

     Va većih razredih bilo nan je sve novo i drugačije, više meštar kih smo se više bali i imeli prenavar, voleli nikoga više nikoga menje, a siguro tako i oni nas. Ma nan ote vavik ustat va pemeti naši meštri:  Hilda i Pere Morožin, Marija i Bruno Dujmović i sedaj već pokojni, Bosiljka Toić  i Anton Polonijo.

Od petoga razreda deje prihivali su nan dica z Risiki. To je bila prilika za nove  prijatelstva ke duraju još i denes.

     Tada, va našoj staroj školi na Placi, vrime  kako da nan je zletelo. Ne znajuć za boje i lipje, bili smo kuntenti va onih tesnih razredih i još menjih hodniki po kih smo se rivali a niki dodar i šujali po ostervici, tekuć na Placu za vrime odmora.Veće razredi su imivali školu vjutron, a menje na dvi ure zapolne. Va sekoj prostoriji je bila peć na derva vokolo ke smo se po zimi tisvali. Fanj let je delala i školska kuhinja pek smo tekivali da čin prija dobijemo marendu skroz poneštru ze železi ka je i dandenes na iston mesti, samol bez želez. Kuharica Luce, veće  zdavni pokojna, davala  nan je čaja al beloga kafa va čašice i landicu kruha z pekmezom al nikakovin želtin siron kojstoga baš nismo voleli.

Če mislite su l ta  žingana čašica al lončić ke smo nosili seki dan z domi va školu i nazad, ki put  udelali tonbul i su l imeli na sebi ku botu? Ugonite!

     Inšoma, žvelto bimo pojali i ondat se sirgali po zičićih. Muški su se šenpre skačuć jedni drugin na škinu sirgali „ gobi“ , a  mi ženske „ na pera“ i to tako da smo perst močili v usta da čin legje i berže obernemo te od černila šporke pera i spravimo jih va škatulicu od fuminanti. Ki zna je l tutu bil morda i ki virus? Va drugoj škatulici smo imivali dlačice ke smo  doma skubli od šjalić al bijic i mej sobun  se za nje minjali, a šenpre  smo zavoj toga doma od matere otresli ku ćepu al pjesk.

      Lipo je bilo to vrime kada smo bez televizije i crtić, bez „ajpodi, ajpedi i tableti“ bili srićni  kako to ume bit samol dica.

                                                                                     

Manje poznate riječi:

halašić – dečkić

znahorjivo – posebno, uočljivo

ostervica – rukohvat

tisvat se – tiskati se, naguravati

žingan – emajliran

tonbul – pad

bijica – pokrivač, deka

pjesk – lagani udarac rukom