Nisan se štufala

Piše: Marija Gračaković

            Ča da van danaska pravin? Ovako je to bilo:

            Odkad san se navadila pisat i čitat slova – libri su mi sprid oči, sprid mene i nisan se fermala „buljit“ u njih.

Ma kada ćeš se ti  štufat  u ti libri buljit? Oči ćeš zgubit! Ja san već štufa to gljedat, jadila se je mat.

            Ja san samo mučala aš nikad ni bila užanca zo stariji, a posobojno zo mater se pregudat. I tako se do dana današnjega  nisan štufala u libri „buljit“.      I pomislin:

A ča ću brižna, sakomu je nič sujeno.

A kada san najviše žalosna i trudna, ja ne gren habat muziku, ne gren delat u vrtal (sve ako  jako volin i verduru i rožice), ne gren se šetat leh zemen libar u ruke i „buljin“. Aš libri jimaju niku čarobiju vase i kad ti ta čarobija jedan put klade ruku okolo vrata, ne pušćuje te do kraja života. Libri velu moć jimaju! Pomoru nan da sve razumimo, da se navadimo na sve ča je vridno, lipo, dobro, da budemo bolji ljudi, da razumimo drugi ljudi sve ako su i hudi  i drugačiji.

            Od svega toga „buljenja“ u libri počele su mi se rivat nike rashitane, zabljene besede. U te besede kako da je u dičji povoj zatafnjan sva moj život. Da se nebi opet zabile i zgubile, počela sa jih zapiševat . Znenadit će vas da san od njih doznala čudo lipih štorij od sebe same. Zapiševala san te štorije i svoje i tuje. Dragi svi ki ovo čitate,lipu san pomoć jimila u vaši listi i poručki i hvala van na tomu. Hvala ča ste bili tote uz mene  kada san van, tužna i razočarana, bila rekla: „Bog, ja ne moren, ja neću više.“

            Nigdi u dušu zvonila mi je stara, mudra misal: „Ki ne čuva svoju starinu, ni Bog ne čuva njega.“  A da se na Kornić još čuva starina govora (kad san mislila da je sve zgubljeno) potvrdil mi je i jedan list, napišen 3. 10. 2020. koga mi je poslala gospa Jasminka Ban  Grahovac. Jedan del toga lista re ovako:

(…)Vaši me tekstovi vraćaju u djetinjstvo na Kornić. Kao da ponovo slušam moju babu  i deda, Ljubu i Mika Matanića.

(…) Mi svako ljeto u našem dvoru u Brajutovcima organiziramo  čitanje Vaših tekstova. Okupimo djecu, susjede i njihove unuke i tada moja majka čita Vaše tekstove. Mi pogađamo što koja riječ znači, ja se prisjećam što je i kako radila moja baba… Pričamo priče o jednom vremenu kojeg moja djeca ne mogu ni zamisliti.

Ča reć, leh: hvala, hvala…  Hvala  ča niš ni zgubljeno i ča naše lipe besede padaju na „plodno tlo“.

Kigod put mi i prefali  beseda, ma išćen, po glavi kopan, a ona zi jenoga raskusanoga libra pride van i još „budi volja Tvoja“ zi nikoga kantunića pošpija i važge niki zabljeni oganj na stari komin.

A večer kad gren spat zo oprti oči haban kako mi srce bati:  Ča, nisi se štufala?

Ne, nisan, nisan se štufala!

I libri, i ča, i besede drže me kako znamenje i šnjimi laglje potrpin to tvrdo življenje.

Marija -Jadranski susreti

***

štufat se   – zasititi se; navadit se – naučiti;  prefalit – uzmanjkati;

pregudat se – odgovarati, negodovati, svađati se