Piše: Marinko Pilepić

 Dol va Kastafčine reču za veli i gumbok dolčinu. Na dne Dola su najveć ravni za kosit, a va nekeh i lehi. Jedan dol ima i kalić pun vodi i nikad ne presuši. Ja ću nabrojit pet va keh san bil i to po rede od Halubja do Smokvarije : Klićev Dol, Kosov Dol, Črni Dol, Bezjakov Dol i Pletenčev Dol. Najboje poznan Bezjakov Dol. Najviše puti san bil va njin, a i gjedan ga saki dan tako da vidin kako se menja. Od Bezjakovega Dola ću napisat par crtic.

Bezjakov dol

  Strme i uske, kamenite stazice se spušćaju va Bezjakov Dol. Na samen dne se je pokošeno, rodne lehi nagnojene, lepo obdelane i pune roda. Nasred Dola je veli kalić pun vodi z kega se voda nosi za zalevat a za većeh suš i za blago va štalah napojit. Da bi se lagje do vodi prišlo vredne ruki našeh stareh su storili široki tesani hrastovi skalini i lepi kovani rukohvati. Nona Pepa mi je povedala da kad su bile vele suše i va Dole malo vodi da je bilo videt osan skalini. Za većeh dažji voda ku ne more kalić prijet oteče kod jedan potočić va  vetrenicu blizu kalića. Tu rastu visoke topole, a se okole po strmeh rebrah je najveć hrastova šuma puna puhi. Mi dečina smo se tu navadili plavat i ni bilo dana da nismo protekli va Dol, igrat se, po lete plavat, a kada treba i pomoć  delat va intrade.
Ovi opis Bezjakovega Dola vrnja me va vremena kad smo bili dečina. Danas je to posensega drugačije. Zaraslo je i zapušćeno. Postal je to raj za divo blago kemu je va Dole i gustoj šume sveti mir. Ostale su, ako niš drugo, lepe uspomene na jeno vreme kega već ni.