Diraki (2.del)

Ovo j’ drugi del štorije od Dirak, sela ko j’ mej najmanjemi i najstarejemi va oven dele Kastafšćine. Zapis je pisal Jakov Jaša Grbac, učitelj, 50-teh let.

Za strehi (slamun pokriveni dvori za blago) porabilo se j’ sako leto po nekoliko škopnjaki slami, pa se j’ zato selo šenice, šegali i ješmika, čega već desetak let ni skoro niš, aš slami kupe i pripejaju (od Jurčić). I intradi seje se se manje i manje ( i to: hrmenti, salati, metovilice, špinači, radića, rokvi, karoti, merlina, petrsina, repi, peši i dr., a sadi pak: kumpira, fažola, graha, luka, pora, česna, kapuli, kapuza, broskav, kumadori, kumari i sl.), aš ni više ki vuć one teške kofi na placu, kako nekada. Ženske su se pogospodile i prezele od gospodari i kasu i komandu, pa joh Ti ga njemu, ki njih se zameri, aš ga “zamu za zajik” tako, da i on ki je to anjel dobar, – po babjeh besedah – postane vrah.

Diraki, danaska

Žir se je užal prodat (a doma su – najviše deca – pojili nagnjilo, otučeno, al najedeno); sad se pak poji slobono se i samo ča zostane nesu v Reku na placu. Bilo j’ grozja, od kega store jako dobro vino, praskav, črešanj, smokav, poneka jabuka i krušva, okrušvić, oreh i kostanj, pa okol petnajst veleh murav okole kuć. Mej ten, sad je i tega se manje, aš staro posiše, a mlado se ne posadi. Amuli sami zbrukaju i dobro rode, al’ se slabo jidu i na placu nose, aš nisu jako štimani; od njih kuhaju rakiju pa je prodaju, al’ je z dropami prekuhaju.

To se raste z južne strani od sela, i to va Sele”, kako zovu nekeh 500 m dugu, a 75 m široku oazu (prej crkveno, a sada od više gospodari z trih sel). Nad ten platoon (selu Diraki od bure-bandi) se j’ superbo nasadil breg Bajevac, z relativnun visinun od 30-50 m, a nad moren za 279 m, t.j. 30 m viši od Sv. Križa (ki ima jušto 249 m nadmorske visine). Do najbližega peska pul mora trebe pasat 3 i pol km i hodit dobre pol uri.

Crekva Sv.Križ, pogled od Dirak

Ča ni posesano z vrti i njivami, to j’ pak ograjeno za umejki (va keh je već bilo baš dosta lepeh i veleh grmi i druge porubi, dokla nisu to – pasanega rata – Nemčini uništili i ća spejali). Neograjenega općinskega imanja, ale komunala, ni – sporad tega – skoro niš blizu našega sela, al je zato putić i stazic (mej zidi od poses) raskrižano na se strani. Kolac se naseče sejeno dosta za ruže, al za goret treba dreva (i ugjena) prikupit.

I s teh našeh umejki, zgubili su se tići. Nekeh je puno manje, a par sorat (dršći i drozgići, pa kravuji i kukavic) je baš i nestalo. Razlog temu su pucnjave (rat, soldati i delo – mine). Ostalo je najviše orebac, keh bi voleli da ni pod našemi žlepci, ni va našeh vrteh.

Ni kačak već ni, kako j’ nekada bilo. Najde se se kadegod još ki poskok ale riđovka, ma i to jako retko, aš su ih judi potamanili i skoro posensega zatrli.

Škodljivega blaga na intrade i dreve je se više; a raširile su se i neke boli tako, da trebe već se škropit i posipat, ako će lepo prizrenut i bit za korist.

Od II svetskega rata pa na ovamo, zbaštardalo se j’ nekako i vreme. Ni onako vedrega neba, čistega zraka ni diha ki preporaja, kako j’ to bilo do atomskega veka, nuklearnih eksplozij i stroncija va zrake.