Ava, meni, ava!

Autorica: Marija Trinajstić Božić

-Ona moja vnuka se 

  va raskidanih bragešah šeće

  i  nanci  malo jih

  pozašit neće.

  A vleti, kada sopu čverčeki 

  postoli koti  škornjice nosi, 

  aš da se va sandalah ne gre

  ako na nogah nisu hoveje.

  Vlasi  je popiturala

  va niki želti, kako da bi od mirlina kolur

  pek kudagodare pasiva dela veli hunhur.

      Tu žensku  je od muki počel  pot oblivat

   ma istešo ni mogla fermat:

 -Jošće ti moran va četire oka reć,

   govorela sen ja, ši, mojoj hćeri već

   da je on nje muž pravi finfirić,

   ki šolda nigdar neće imit

   nanci za ditetu cele brageše kupit.

   Pohabala me ni, pek su nje hćeri

   brageše na kolenih šenpre raskidani.

    -Ava, meni, ava

      tužna ja i neboga-    

            jošće je jedenput zrekla,

            z čela pot oterla

            i  partila zgoru klancen doma. 

Vrbnik, veljača 2018.