Bogatiji od mene nećeš bit

„Bogatiji od mene nećeš bit, aš ja jiman nikoga

ki mi je pravljal štorije.“

Nepoznati autor

C:\Users\Dinko\Desktop\BABA MARE.jpg

Pasal je marač, pasal je prvi dan protuleća koga smo nigda, kako školani, jako štimali, ma pasal je bome i Svitski dan pravljanja štorij (20. III. je Svjetski dan pripovijedanja priča).

A ja obožavan štorije, aš one su mi velo bogastvo duše prnesle. Ma lahko jih je volit. Samo njin se rabi pustit. Oni ki to ne znaju zavavik su zgubili ono dite vase. Štorije te zamotaju u vel od čarobije, zemu za ruku i peljaju na dugo putovanje u niki svit pun mašte, dobrote, ljubavi, šegavije…

I da se tornan na lipotu i bogastvo štorij: saki čovik mora jimit nikoga ki će mu darovat tu bogatiju, aš bez nje će zgubit najpuniji i najlipči del življenja. 

Ja san jimila svoju babu Maru, po svemu najsvitliji lik mojega ditinjstva, posebojno po onomu kako je znala pravljat štorije zo ke je u moj život prnesla  onu bogatiju zi naslova. Držeć njoj se za kamižot, čudo san toga od nje čula, naučila, pa i to kako su svit mašte i svit stvarnosti jako prepleteni i da nan kigod put sliče na najlipču čarobiju, a drugi  put na nič najgrje. 

Nje su štorije, još prvo leh san šla u školu, slova navadila i sama čitat počela, bile moja prva „lektira“ ku san kako spužva vodu upijala i do dana današnjega jih nisan zabila. A sakakovih je toteka štorij  i molitvic bilo: od nje ditinjstva, življenja, dela po kući  i u kampanju, od dva muža i šest dice kih je jimila, od štrig, štriguni, malići, kudlaki… Ja san kako mala šnju spala u „staru kuću“ kadi je, dokle je mogla sama živila, pa smo večer molile i potle toga mi je pravljala „svete štorije“ od Isusića, Majke Božje, svete Lucije, svetoga Mikula, svetoga Petra (koga je posebno štimala, aš on je zaštitnik nje rojene župe Garica), svetoga Osipa ki je bil nebeski zaštitnik nje drugoga muža…

Ona ni nikad u školu hodila, nikad ni pisat i čitat navadila, a toliko je čudo toga znala da se ja ni danaska prečudit ne moren odkuda njoj tolika bogatija znanja.

Od svih babinih štorij pravit ću van danaska jenu ka se nastavlja na on dren od koga smo se  već na ove  stranice  divertili (raznodili).

DRVO KRIŽA 

C:\Users\Dinko\Desktop\rano cvel - dren.jpg

Vazmeno je vrime ko nas domišlja na Kristovu muku, osudu, pribijanje na križ i na njegovo sveto uskrsnuće. Fermajmo se kol – križa. Po babinoj štoriji ka je živila mej narodon i pravljala se „od usta do usta“ , dokle je Isus Krist po zemlji hodil  dren je bil moćno, velo, „razgranato“ stablo,  kako i dubac (hrast). A kako i danaska, dren je bil jako zdravo, čvrsto stablo, pa je jušto on zibran da se od njega ziteše križ na koga su razpeli Isusa. Dren je radi toga bil jako tužan da je i proplakal.

„Zač je, od svih stabal jušto meni odrejena tako strašna i okrutna „uloga“ da buden drvo Kristovoga križa? Ča nisu mogli  zibrat niko drugo stablo? Da san se prvo toga manko osušil, u zemlju propal“, jecal je dren i pušćujuć gorke suze. 

Isus je na križ strašne muke trpil, ma istešo je, kako i vavik, mislil na drugih, pa se je sažalil i na plačući dren. Rekal mu je:

„Ne plači, nisi ti niš kriv, krivi su, kako i vavik, grešni ljudi. Od danaska ćeš bit, ne stablo, leh grm. Bit ćeš povijen, prepleten i nikad nećeš narast toliko visok i moćan da bi se od tebe  mogli delat križi. Si kuntenat?“

I tako je bilo, a dura više od dva miljara let. Dren više ni velo moćno stablo, od njega se ne moru delat križi, ma za Velu šetemanu ka nas pripravlja za Vazam, on Kristu na slavu i čast, procveta zo gropi žutih cvetići ki nas domišljaju na njegovu trnovu krunu ku su mu na glavu klali. Je srićan ča više ni tako moćno stablo kako dubac? Ja verujen da je. Važno da je zdrav i ča više ni „drvo križa“.

***

Dragi, svi moji. Danaska ću vas za kraj pozdravit zo misal našega dobroga pape Ivana Pavla II.:

„Mi smo ljudi Uskrsa i Aleluja je naša pjesma.“

Neka nan blagdani Isusovoga uskrsnuća daruju nadu, zdravlje, ljubav…

Srićan van i blagoslovljen Vazam.

Piše: Marija Gračaković