Šegaviji od vraga

„Dok još zima vlada svijetom
Drijen procvjeta žutim cvijetom." 
                                            D. Posarić

Grda nan je i teška bila ova zima. Meni se je paralo da protuleće ni ne misli pušćat svoji sinjali. I kad se ni nadat nisan mogla – u jenu šumicu spod naše kuće (ka je, za prečudit se, ostala jedan omejak „netaknute prirode“) – procvetal je dren. Šla san, ma skoro potekla, kuntra njemu i domislila se na dvi rečenice ke san zapametila još u kornićarsku školu: „Proljeće započinje kada drijen procvjeta.“ i „Proljeće zamiriše u cvijetu drijena.“ (Lipa i pametna naša meštrica Marija Brzac!).

Ov „moj“ dren, ki još ni pera nima, zaslipil mi je oči zo gropi svojih zlatnih žutih cvetići. Ma ča  reć, leh: „Bravo protuleće, neka si nan prišlo, komaj smo te dočekali!“

Dren (drijenak, lat. cornus mas) prvi procveta, a plodi mu drnulići ozdriju, na jesen, zadnji. I toteka leži „štos“. Šubito san se domislila na jenu starinsku štoriju ku mi je, kako ditetu, pravljala moja baba Mare, a ona re ovako:

Vidil je vrag procvetali dren, hitil se je na njega i rekal: 

„Moj si, prvi ću se oslastit zo tvoji zdreli plodi.“

 Kašnje su procvetale črišnja, jabuka, krušva, praskva…, a vrag se je samo smijal:

 „Dokle od vaših cveti pridu plodi, ja ću bit sit i kuntenat (zadovoljan).“ 

Ma bekal (prevaril) se je. Kako je vrime pasivalo počele su zdrijat črišnje, višnje, jabuke, grozje…, a na „njegov“ grm drena bile su samo zelene pera. Vrag je i sam pozelenil od jada ma još ni bil pacencu (strpljenje) zgubil. Ontrat su se, o Miholji, počeli pokaživat mali črljenkasti plodi. „Ekola, ki čeka i dočeka. Hvala vragu“, rekal je i zagrizal ma plodi su bili žuhki i „opori“. 

„Vrag mater i drenu“, zakljel je, skočil doli,  pljuknul i nikad se više tornal ni.

Vrag je tako kljenuć partil, a za nikoliki dni plodi su ozdrijali, postali škuro črljeni i mehki. Moglo jih se u slast jist, rakiju od njih al marmeladu delat. A sve je jako fino i posebojno zdravo. Tar se uža reć: „Zdrav kako dren!“

I seda: mi lokmartinski, murajski, kornićarski dičina ki smo se zo drnulići i zo drugin šumskin voćen slastili bili smo šegaviji od vraga,  aš mi smo dobro znali staru „mudrosnicu“: „Dren, rano cvel, kasno zdrel.“ (Ovo „cvel“ spada u „pjesničku slobodu“ radi rime, aš mi bimo u sagdanji govor rekli „cval“.)

Mi smo se kako dičina navadili da ljudi i prirodu rabi štimat, naučit nje zakoni, da rabi pacence jimit, a da će skromna nagrada (ov put kako, za nas jako važno, šumsko voće) sama po sebi prit. To zame znači, šegav bit! I danaska verujen da smo  šegaviji od  črnoga vraga bili  – i ostali. 

Vela hvala onin ki su nas i to, kako i čudo toga, lipoj krijanci  navadili. To smo kako dotu i spomen na ditinjstvo, zeli sobu u svit. I pobožno se toga držimo, a vrag neka škriplje zo zubi. U svoju se lakomiju i zločestoću prevari  kada se najmanje nada.

Marija Gračaković

šegav – lukav, pametan;

grd – ružan;

šubito – odmah, isti tren;

ekola – eto;