Fudlak i kresnik

Judi deju, da j’ na svete sega i sačesa, ča ni sakemu dano znat ni videt. Neki judi da su tako rojeni, pak da se večer prehite va črnega pasa. To su fudlaki. Joh i kataloh je za onega, na kega se fudlak nameri.

Pokojni Barić da j’ šal jedanput s fraja od Pavlićeveh. Pod Melišći j’ počel na njega naskakat jedan veli črni pasina. Ale za sreću j’ pak pritekal jedan još veći beli pas. Zajeno da j’ hjastil na črnega pasinu. Pasi su se tukli, aš niš nisu lajali. Se jedan prek drugega su se skonbrčevali, macuhali, zubini škjocali. Grdo njrcali i vajali se po pute. Na vrh Ilovac da j’ črni pasina pobegal kuntra Mavron i da se j’ nekamo zgubil. Beli pas je Barića kunpanjal vaje h Mladenićen se do pred vrata. Barić je komać od straha doma zašal. On črni pasina da j’ bil fudlak, a on beli kresnik.

Fudlačina po noće judi napastuje, a kresnik jih od njega brani. Štrigun ale fudlačina j’ človek, ki se j’ z repićen rodil, pak mu ga nisu odrezali. Kresnik je človek, ko j’ rojen z črjenun bareticun, pak mu ju nisu zašili pod levu pazuhu. On nijenemu ne naudi i ne naštriga, ale razvrže roki onemu, ki j’ naštrapal ale kega j’ ki zaštrigal. Najhuji da j’ onisti fudlak, va kega se prehiti pop.

Od fudlaka kako i od štrig, deju judi, mora se človek očuvat i ne te mu naudit, ako ima va žepe česan samac ale detelinu od četira pera. Dobro je imet i blagoslovjene uliki. Neki judi obuču nopak stomanju. Ni h njemu neće fudlak, ki ima palicu od črnega gloga, ki j’ rasal tamo, od kuda ni mora videt, a posečen je na kvatrni petak. Pokojni Pavlić je imel takovu palicu i ne bi bil šal prez nje večer nikamo za vas svet.

Kresnik ume roki razvreć i zgojit blago i judi, ki su naštrapali od zmamorije. Vas svet je gučel za Matića na Brgude, da j’ kresnik. Saki dan su se na trupi prihajali k njemu judi od seh mileh krajih. Kega nisu mogli medihi zgojit, šal je kresniku Matiću na Brgud. Deju judi, da j’ zgojil se z nekakovemi medižijami od travi čuda bolniki, ki su prej sprovali si duhtori, si špitali i se lekarije.

Ja, narod je paral, da duhtori ne moru zgojit od naštrapa, lego da to more samo kresnik. Zavin tega su judi hojevali k Matiću i verovali su, da će jih zgojit. Matić Kresnik da j’ po noćah komatil, utinut va kvatreh. Po križanjah, kade ima stočišće zmamorija, da se j’ tukeval štrigami i fudlaki.

Ivo Jardas, Kastavština