Dešpetjivac

Piše: Marinko Pilepić

Tone Žandarićev je bil od mićeh nog dešpetjiv i vragovit. Kada se j’ 1858. leta delala nova Cenetina kuća pul Garić bil je fantina od 11 let. Po vas dan se j ‘vrezal i motal okol zidari ki su jušto skod zidali i dešpetal njin da nisu mogli na mire i kako rabi delat. Jedan se j’ spametil da ga malo umire pak je za kantun od skoda vezal špag, a drugi kraj podal Tonetu neka miro i drito drži nategnjen špag dokle ne fine ta zid.

Ni mu rabilo čuda, onako prefriganemu, da dosegne kako su ga nabekali. Spustil je špag i pobegal va Klanac zgora Juretove kuće i otamo jih je zbijal i navrnjal z kamenen. Ta dan se više ni zidalo…