BRSEČ JE IMEL SISOL, A SISOL JENICU

Piše: Cvjetana Miletić

Čuda let Brseč je imel oštariju Sisol. 

Ime j’ dobila po brege, ki nad gradon stražari, i na ken je, kako legenda poveda, svojni bil grad, zvan Gradac. Grada već ni i ne pamete ga, samo ga tu i tamo poišću planinari kad gredu na pohod od Plomina na Učku. 

Pred oštarijun su se čuda let fermevale kurijeri, ke z Istre voze za Reku i ponopak. Tu njin je, kot da bi na pol puta, bilo počivalo. Judi su neš pojili, popili, zapušili i olakšali se.

Oštariju je sa leta nastala Eugenija Salković, ku su – vavek onako veselu i nasmejenu – i stareji i deca zvali samo Jenica. Umela je storit najlepji sengvić od pršuta i nikad ni prodala skarsu meru vina. Zato su ju štimali i dela je vaveki bilo. Nekad više, nekad manje. 

Kad je spreda bila fermana kurijera, nutra se ni moglo od judi. Jedino se za jenen stolon vavek igralo na harti. Njin ni pačila gnjeta. Igrali su za vreme potrošit. A ako neki mej ten naruči dva po dva al pijat pršuta, još boje. 

Jedan od igrači je bil Miro Boninkin. 

Velik i krepak čovečina, a srce mehko kot bumbak. 

Volel je briškulu više leh Boga i jedino je va hartah bil vavek oštar. Ki dobiva dobiva, ki gubi gubi, samo zad stolon je moralo bit cito.

Jedan pondejak su već od jutra igrali. I naigrali se. 

Jušto tisti pondejak va Brseč je prišal i Ljubo Pavešić. Sobun je prnesal magnetofon da na plečić navreze štoriju za emisiju Naši krajevi u riječi i glazbi. Delo je brzo odbavil i šal h Jenice na bićerin. 

Kad je videl kako briškula tuče po stole, priko štal se dva koraka bliže i stal baš vizavi Mirota Boninkinega. Dva vela čoveka. Miro, čovečina od skoro dva metra i Ljubo, niš manji ni tanji od njega, po užance va črjenoj stomanje na kvadrići i s fijokon pod bradun, samo su se pogledevali i mučali. Je al ne va ten Ljubo storil ki mot i ne otejuć, ne znan, ma Miro ga nekako grdo pogledal, a Ljubo je leno zasukal rukavi i rekal: “Ča me tako grdo gjedate?” 

Miro ga z očijami premeri i šćeto odbrusi: “Da ste sled lepši, bin vas i sled lepše gledal!” 

Na to su se obadva nasmeli, a na stol je prišal dupjak. Častila je Jenica.