Ploča, ma ne gramofonska leh užanca ka se j’ zatrla

Ovu štoriju prenosimo z Facebook grupi Udruga Beseda, kade saki dan preroštamo čuda domaćeh besed i malo prokomentiramo ča znače. Napisal ju je Alfred Šaina, a nažalost je to beseda ka se već slabo govori, aš se ni kuće ni ploče više ne delaju kako nekad.

Piše: Alfred Šaina

Ja, danaska kada neki reče besedu PLOČA neki će se domislet gramofonskeh ploč, neki šperploči, neki kakovega pokrivala od kamika, ma ploča je bila i, uvjetno rečeno, užanca, a zapravo više potreba va stareja vremena kada su judi kući delali onako više po starinsku, puno sami i s pomoćun kakovega zidara ki j’ imel svoji težaki.

Spadan va generaciju ka se još domišja vremena pred rečimo 40-50 let kad se j’ puno kuć va našen kraje delalo. Neč noveh, a neč se j renovitalo. Jedno od većeh del pul tega je bilo storit ploču. Negde lih od čistega petona, a negder i od armiranega. Sa druga dela va zidarije delale su se na pomalo, ma ploču je bilo trebe va jedan dan storit. Zato se j’ zvalo susedi i prijateli pomoć, a kade j’ takova trupa judi onput to već počne bit užanca.

Zidar, ki je bil kot proto, je skupa z svojmi judi se parićal i zašaloval da kad judi pridu delo gre čin brže i boje. Najprvo se j govorilo od vremena, prognozi nisu bile precizne kot danas, a vavek se j’ neki boje razumel. Neč aš je mesec takov, neč aš su oblaki takovi, ma delo j’ bilo storit ako se j’ počelo, magari sekiri padale.

Delalo se najveć nedeju aš ta dan je najveć susedi i prijateli moglo prit “dat ruku”. Jutro na dobu bi se našli. Gospodarica ih je s kafon nutila, gospodar z rakijun “za gjisti oparit”, a glavni zidar je delal raspored ča će ki delat. Jedni su bili za meltu mešat, drugi su ju va karijolah vozili, treći su ju rasuli, a proto je z svojen pomoćnikon to drical z jednun ravnun daskun i fratonon.

Moj nono je čuda let z dobremi zidari delal i on je vavek bil prvi pomoćnik glavnemu zidaru. “Šotoufičal” je rekal sam za se, a tu besedu j’ prnesal z talijanske vojski kade je bil inžinjerac i to va Abesinije. Otac je bil inžinjer, učen čovek, razumel se je va struju, ma va zidariju niš, zato je vavek gledal ćapat delo kade mu ni bilo jako za mislet i glavu razbijat, kot na primer vozit karijolu. Kako je bil tehnički direhtor va jednoj veloj firme, susedi i prijateli ki su bili va firme “pod njin” komać su pričekali da mu moru komandirat i tirat ga: “ala brže”, “gani se”, “ča misliš da si i tu direhtor” i se tako…

Mane j’ nono jutro poslal cigareti kupit. Jednu škatulu “Primorki” i jedan “Ibar”. To se j’ jutro ponutilo prej dela, pak potla marendi i kad je delo bilo finjeno. Potla san bil na špine i otpiral i zapiral vodu onen ki su meltu mešali. Kega na ploču zvat ni bilo baš tako lahko za odredit. Neki će se ufendit ako ga zoveš, a neki ako ga ne zoveš. Neki j’ dobar za delat, a neki lih pride aš je jist i pit za niš, a neki je pak dobar za judi zabavit.

Jutro, prej dela, malo j ki rakiju pil, ma bil je, ću reć Zvanić, ki je zajdin dve opral. Do marendi se j’ sako toliko “zgubil”. Šal je k none i vavek je imel neku škužu za pitat rakije. To se zna da j’ do večer bil dobro nasupan i kad je doma prišal je još i ruku na ženu zdignul. Drugi dan je ta sirota ku j’ stukal prišla mojoj none zmerat da zač mu j’ pit dala. Na kraje ni bil on kriv ki ju j’ stukal, nego moja nona ka mu j’ pit dala! A bil je i jedan kega su vavek rada na ploču zvali aš kade j’ on bil je vavek bilo i smeha, a kade j smeh i veselje, se lagje i dela. Ni bil jako za delat, to su si znali pak su mu vavek dali neko najlagjo delo. Ja ma, čin su mu rekli ča mu j’ za delat on je počel mirakulat da zač njemu vavek najtežo delo. Vavek se j’ našal neki ki mu j’ ponutil da se zamene. Ja, ma j rekal:”Neću i ne bin za niš. Potle bite govoril da san na lagjo delo šal.”

Okol desete uri j’ bila marenda. Delafci j bilo trebe par puti zvat aš je seh kot sran bilo delo fermat. Kad je delo bilo finjeno, su se delafci malo opjahnuli pul bačvi va koj je bila voda i onda su šli na obed ki je paron parićal. Za obed je bila domaća hrana, ma onako na obilo. Ne daj boh da j’ ki lačan ostal. A žejan još i manje. Ploču j’ bilo trebe zalet. Ovako i onako. Da se, ne daj boh, ne rasuši. A danas mladi ne znaju ni ča j’ gramafonska ploča, a za ploče na kućah treda misle da su odvavek kamijoni mixeri prihajali i da j’ to do marendi z dva delafca bilo gotovo. A kakove štorije su to bile!