Naš otac Ivić Kukurin Zvankotov od Belić

Piše: Ivan Kukurin

Najstariji san sin Ivića i Marice Kukurin od Belić. Rojen san va familije ku su zvali Zvankotovi. Moj otac je rojen va istoj familije, a mat va susednen sele Jurčići, pul Stanaroveh. Tradicija je bila da se najstarejemu sinu da ime po oce ili nonote. Mane su nazvali Ivan, a da bi se znalo od kega se govori, mane su zvali Ivica, mojga oca Ivić, a nono je bil Zvanić.

Naši roditelji na svojoj ženidbe i na godišnjice 50 let braka (foto: obiteljski album)

Moji mat i otac su finili va Kastve pet razredi osnovne školi, a nono je oca poslal va veće školi najprvo va Karlovac, a onda va poljoprivrednu školu va Maribore, va koj je bil najboji učenik. Užal je povedat da se j’ po noće vadil va zahode. To školovanje ni do kraja finil, aš ga je nono povukal doma, da mu pomore delat i održavat familiju. Imel je još stareju sestru Fanu i brata Rudeta i mlaju braću Lojzića i Milicu.

Naš otac od mladosti do starosti (foto: obiteljski album)

Od seh je jedino moj otac ostal na starine i z’ ocen delal i unapređeval familijarno gospodarstvo. Leta su bila sakakova, pa je bilo jako teško preživet. Uz so delo krenul je va posal z građevinskemi makinami za mlevenje batudi i mela. Na kraj Belić prema Spinčićen bila je kava kade su težaki kavali kamik kega je s’ krošun mlel va batudu, ku su težaki s’ kopanjicun hitali va veli, drveni, pleteni koš, ki je bil na voze. Kad je koš bil napunjen, konji su voz pejali po ceste prema Spinčićen. Na meste kade je trebalo skrcat batudu, otac se je obrnul ritinski i koš pun batudi prijel z obedvemi rukami i zisul batudu van. Ja san to gledali i nisan mogal verovat da to more storit jedan sam čovek. Bil je jak i delavan.

Sako jutro je najprvo nahranil konji, pripravil vozi, neč pojil i onda šal za delon kade je bil do noći. Pokle večeri je šal va „delavnicu“ kade je popravljal oruđe i se ča j’ rabilo za delo. Imel je drajs (tokarski stroj za drvo) kega je pokretal z nogun. Va delavnice je bil maltene saki dan do pol noći. Mat ga je čekala i onda su šli leć do četireh ur jutro i onda na delo.

I moja mat je bila jako delavna i volela je na dele kantat. Spamećujen se kad san šal š njun na Belićev breg, kamo je šla po veje za pod blago va  štale. Celo vreme, dok je grabila veje na kup, složila na plašćanicu i oprtila na škinu, smiron je kantala i celi put do domi.

Jurčićevo seme

Spametin se, moral je bit neki blagdan aš je moja nona Pepa frigala supice. Ja san se neč ofendil i pobegal vanka pred kuću i sel san na neke gredi. Par puti me je teta Milica zvala neka priden va kuću jist supice, a ja san se i daje trdoglavo urtal. Čul san kako nona govori hćere: „ma pusti ga, to ti je trdoglavo Jurčićevo seme“. Puno let kašnjeje san razumel ča je to značilo. Moju mater – kako nevestu – moja nona Pepa ni njije hćeri nisu trpele pa je to šlo na ta račun.

Va toj mojoj Zvankotovoj familije nisu bili baš iskreni kad su govorili od nekeh judi. To san također razumel puno let kašneje kad mi j’ palo na  pamet kako su se drcali z’ nogami pod stolon. Ja san to opazil kad san se kraj stola na tleh igral.

Va kuće su vavek bili problemi svetlon. Va dvor i štalu sej šlo s feralićen na petrojo. Va kuće je gorela lampa na petrojo z staklenem tubon. Napredak je bila lampa na karbit ma njoj sej brzo zapunil pisak pa je onda škercala. A još veći problem je bil ča je rezerva karbita brzo nestala aš smoga mi deca ukrali za pucat va prange

Kod mladić je pekal janjci za fešti (foto: obiteljski album)

 

Fotosi za boravka na Sušake (foto: obiteljski album)

Oštarija

Naš otac je 1939. leta na Sušake unajmil kuću z velun ozelenjenun teracun i tu otprl oštariju „Zagreb“. Oštarija je bila z leve strani ulaza va Harteru – tvornicu harti za cigareti. Oštarija je brzo postala omiljeno mesto judi ki su voleli dobro popit i pojist, keh su zvali „bankulovići“. Ja san imel šest let pa se spamećujen puno tega. Saki petak su delavci va Hartere dobivali plaću i na kraj smeni najprvo su navalili va očevu oštariju. Ja san se obično vrzmal uz oca ki je posluževal gosti. Kako je bila gužva san se skril va ormarić zad šankon. Kad je navala pasala otac sej’ spametil na me, ma me ni mogal nać dok mu se nisan javil s tega ormarića kade san se skrival.

Ja san imel neke zadatke va oštarije, tako san skupjal ćiki od cigaret z čikobernic (onda ni bilo filtera) za nonota Stanara. On je od teh ostatki tabaka svijal sebe cigareti. Skupjal san i tzv. krunski čepi od pivskeh boc, ke san odnesal va susedstvo kade se punila pašareta i dobil za ti prnesli čepi jednu pašaretu.

Jedanput je jedan gost va oštarije prigovaral da ni zadovoljan aš mu šnicel ni pečen na roštilje. Otac sej’ skužal gostu, zel pijat šnicelon i šal va kuhinju. Tamo je zel železna klešća za drva, va špargete na ognje ih je užaril i pritisnul na šnicel na ken su ostale crti kot z roštilja. Prnesal je pijat šnicelom nazad gostu ki je sad bil zadovoljan.

Na kate nad oštarijun su bile četire kamari, hodnik i zahod. Naša familija se je četrdeset i drugega leta uselila va dve kamari, a kuhinja je bila na hodnike. Tu smo ostali celo vreme do četrdeset i šestega leta. Ja san bil za vreme pada Italije i dolaska nemačke vojske pul nonota va Belićeh ( o ten vremenu san pisal u poglavju o „Nonotu Zvaniću“).

Zad oštarijun je tekla Rečina, na rečkoj strane su bili nemački maceli s keh su Nemci puno puti pucali preko Rečini na našu stran. Mi mulci z tega našega kvarta smo iz osvete pucali kamene z velun praćkun ku smo ukopali va zemlju tako da smo mogli jako nategnut laštiki i ž njimi doseć krovi tega macela. Neki šefovi su se prišli žalit, ma mi smo se pravili „englezi“.

Maški i kokoše

 Z zadnje strani oštarije su do kapitulacije imeli skladišta talijanski soldati. Zanimljivo je bilo to z mačkami. Njih je bilo nekoliko okolo oštarije, ali par meseci nakon ča su tu prišli talijanski soldati se su mački nestale, naravno su pasale va njihov kotal. Poznato je da se talijanska vojska slabo hranila, tako da su krali voće i povrće, a kade su imeli prilike su pokupili i kokoši.

Talijani su preko cesti pod trsatskemi škalini va stene zdubili veli refuđo, pol za njih, a pol za civili. Mi smo čuda puti bežali skrit se va njin, posebe kad je bilo oslobođenje Reki, tu smo bili šest dan i noći. Kako je naša mat bila snalažljiva, dovukla je va refuđo nekakov stari otoman da mi deca ne spimo na mrzlen pode. Ona je šla preko cesti va naš stan speć kruh, kega je podelila i drugen. Nemci su i na nju pucali, ma imela je sreću za razliku od drugeh.  Jednega dneva su hitili bombu z bacača va kortilj pred refuđo. Tu je poginulo nekoliko našeh judi, među njima i služavka Jolanda  va očevoj oštarije. Mane su poslali da njin ren važgat sveću – lumin va nekoj kamare u blizini refuđa kade su ti judi ležali, aš se ih ni moglo poć pokopat. I danas pretrnen kad se spametin tega događaja.

Ratno vreme

Interesantan je put mojga oca va to ratno vreme, pa ću uvde prepisat neki deli z njigove biografije. Va Hartere je bilo puno simpatizeri NOB-a, i oni su bili stalni gosti va očevoj oštarije. On se j’ povezal š njimi i puno puti su imeli sastanki va našen stane nad oštarijun. Dogovarali su se o prikupljanju pomoći va soldeh, hrane, robe i sanitarnen materijale za partizani i neke potrebite familije, najčešće kade su ostale samohrane materi z decun. 1940. leta su jih talijanski karabinjeri otkrili i zaprli na nekoliko meseci.

Nakon 1943. leta kad su fašisti zapalili sela po Kastafščine su nekeh zaprli va logor Kampor na Rabe. Moj otac je dobil zadatak dostavit prikupljenu pomoć va lirah, soli, cigareti i drugo, ten brižnen juden va logore. Nosil njin je suhe krušne mrvice zažućene na puno masti, ke je pripravila naša mat. Pomoglo mu je to ča je svojmi građevinskemi makinami delal tamo na nekoj ceste, te je kod monter, mogal poć i va logor. Nakon nekega vremana doznal je da ga karabinjeri prate i arival na vreme pobeć zadnjen brodom ki je šal z Raba v Reku. Karabinjeri su mu z osveti uništili se makine ke su ostale na Rabe. Jenu noć je prespal doma, a drugi dan je već krenul va partizani da ga talijanski fašisti ne ćapaju i zapru. Jako se dobro spamećujem dirljivega oproštaja od nas dece i naše materi.

Va partizaneh

Očev put i boravak va partizaneh je bil jako zanimljiv i bogat događanjima. Prema njegoven pričanju, najprvo sej’ priključil Kastafskoj čete na Tuhobiće. Neki su poznali mojga oca pa su se čudili kako je dobrostojeći obrtnik prišal h njin va šumu. Oni nisu znali (aš se onda to ni smelo povedat) da je moj otac već od početka rata bil aktivista ki je ilegalno pomagal NOB-u. Surađival je z susedi od Belić, z brati Jušić Kuzmeton i Arneštoton. Kuzme je bil sekretar partije za Spinčići i Rubeši. Otac je povremeno nosil partizanon va obližnjim šumama hranu, novosti o kretanju Talijani i se drugo ča j´ rabilo. Va Jušićevoj konobe su storili bunker va ken su skrivali aktivisti ken su karabinjeri bili zad petami, povjerljivi materijal i se drugo ča ni smelo prit va javnost. Braća Jušić su va ratu poginuli, a na kuće njin je podignuta spomen ploča.

Nonotov malin

Moj otac je va partizaneh brzo pokazal svoje radno iskustvo i snalažljivost. Trebalo je s kruhon opskrbet bolnicu va Drežnicah i prisutnu partizansku vojsku. Dobro se spamećujem (aš san onda živel pul nonota Zvanića pul Belić, kamo su me dali da bi lagje bilo mojoj matere na Sušake, aš je na brige imela moju mlaju braću) kako san se čudil kako neki tuji judi krcaju na voz nonotov malin za šenicu z dizel motoron i pokrivaju se to stajsken gnojon. To maskiranje su morali storit kako bi, po očeven naputke, taj malin pripejali va partizanski logor negde va šume okol Drežnic. Tu ga je otac stavil va pogon. Auspuh od dizel motora su ugradili va najbližu kamenu grižu da se ča manje čuje. Med Kastavci je otac zibral zidari ki su ozidali peć za kruh, i tu su bili i neki pekari i kruh se j´ pekal. Kašneje, kad je jena njemačka ofenziva pasala tuda, minirala je logor i nonotov malin.

Još jena priča o očevoj radinosti i snalažljivosti. Va Brinje je storil pilanu  bez jenega čavla, aš čaval ni bilo. Povedal mi je to moj nećak Gordan Juračić ki je 1991. – 92. bil načelnik stožera 111. Brigade HV ka je bila stacionirana va Brinje. Načelnik općine Ante Mesić i još nekoliko starejeh judi su se nakon 50 let spamećevali Ivića Kukurina. S posebnen pijeteton su surađivali z njegoven unukon i s celun brigadun. Nisu ga zvali po imene nego Kukurinov vnuk.

Nakon pada Italije puno je Istrani prišlo va partizani. Oformljena je 43. Istarska brigada sa štabon na Planike. Moj otac je postavljen za intendanta 43. Istarskog partizanskog područja, kašneje 43. Istarske divizije. Glavni zadatak mu je bil hranit partizani i bolnice se do Gorskega Kotara. Najvažneje je bilo nabavit šenicu za kruh. Nju se j’ moglo nać samo va Istroj ka je do onda bila žitnica Italije. Bilo je jako teško prepejat šenicu z Istre do partizanskeh logori va Gorsken Kotare. To je bil važan zadatak mojga oca. Preko postojećeh partizanskeh vez su po noće va seleh vreći šenicun obesili na voli i magarci i gonili do partizanskeh logori. Bilo je mesa od blaga i kruha od šenice ku je trebalo zmlet. Volon su z vrećami zamatali nogi kad su šli po trdeh puteh al preko prugi, da jih njemačke straže ne bi čule. To je inače zeto i prikazano va filme „Barba Žvane“.

Ni danas ne razumen kako se j’ odvijal život va teh ratneh vremeneh. Njemački garnizoni su bili va seh većeh mesteh, a desetak km udaljenosti, va šumah su bili partizani. Jedanput san z materun šal h rodbine va selo Jardasi (udaljeno oko 5 km od Kastva) i na moje velo iznenađenje tamo je bil moj otac partizan. Okol sela na uzvisinami su se igrala deca – stražari ki bi javljali va selo da prihajaju Nemci. Tu noć smo spali pul rodbini i drugo jutro rano već su partizani bili va šume aš su dobili obavjest da se njemačka vojska pokrenula s Kastva. Nekoliko puti smo šli hodeć od Sušaka do Jardas, bil je to težak i dug put, a kada god tatu nismo ni videli.

Kad je rat finil, moj otac je kod intendant 43. Istarstarske divizije dobil zadatak preuzimanja seh njemačkeh magazini va Opatije i Reke (od sega i sačega ča je tamo bilo on je doma prnesal dve igri: „Čovječe ne ljuti se“ i šah) On je zajeno organiziral oficirsku menzu va Guvernerovoj palače v Reke. Danas je to Pomorski i povjesni muzej. Jedanput san šal š njin va tu menzu. Otac je zel v ruku škatuletu i rekal jenemu oficiru cenu. On mu je odgovoril da je to džabe. Mane je to bila nepoznata beseda pa san pital oca ča su va škatulete žabi.

Kad je moj otac obavil zadatke na području Reki je va maje mesece 1946. leta šal va Ljubljanu, kade je bila komanda intendature 4. Armije, dat zahtjev za demobilizaciju. Nisu ga ni doma pustili, nego su ga fermali i zajeno postavili za upravitelja vojnih imanj va Šant Vide i Viče va Jubljane. Naša mama je za njin prnesla robu i se drugo ča mu je rabilo. Kad je finilo školsko leto, smo se i mi preselili va Jubljanu. Prvu noć smo mi deca spali va jenoj kamare na tleh. Jutro je tata dal nabrat punu velu košaru marelic, rinul nan ju va kamaru i zaprl vrata. Danas bi bilo teško razumet naše veselje ko je izazvala ta košara marelic. Na kraje se j’ kamara črnila od košćic ke smo od veselja hitali jedan va drugega.

Pul noni i nonota

 Kad su ferije finile ja san se vrnul va Kastav none Francike, maminoj mame i nonotu Pepiću Stanaru. Šnjimi je živela hćer Zdenka ka me je tendila kod mlajega brata i vodila brigu da finin kako treba šesti i sedmi razred, onda su to zvali „mala gimnazija“. Pul noni Francike su me roditelji pustili da ne moran menjat zajik va slovenskoj školi. Moj nono Pepić Stanar bil je zanimljiv čovek. Bil je zidar i volel je popit i prilikom povratka u kuću vavek je kantal „kad voda ni  nezdrava za dečicu nejaku, znam bogme da ne škodi ni brkatu junaku“ ili “rakijice rako ja te volim jako, a ti mene rako va grabu polako“. Spametin se jedne „sitnice“: nono Pepić je imel obešen na čavle zad kuhinjskeh vrat jedan rasklimani aluminijski pajić. Povremeno je š njin počešal svoju škinu i onda odahnul. Inače je bil strog (tako da san ponekad zaslužil i „halopu“) i mojmu ocu je kada san šal ća od njih rekal : Ivić san ti od sina storil pravega čoveka!

Otac kod upravitelj vojnega imanja va Jubljane i Maribore (foto:obiteljski album)

Va ratno vreme su Talijani nonota Pepića pobrali va pržun v Reke na via Roma (nono je govoril „via roma nikad doma“) i tamo su bili lašni. Moja mama je skuhala palentu i va sredinu je skrila frigane sardelice, to san nesal nonotu va pržun. Puno let kašnjeje san mu znal prnest cigarete DRAVA , aš je bil strastveni pušač, bil je sretan.

1947. leta otac je dobil prekomandu z Jubljani va Maribor, isto na vojnu ekonomiju samo veću. Imeli su puno prasac, konji i krav, veli voćnjak i jako puno leh za uzgoj verduri. Još vavek su na imanju delali nemački zarobljenici pod paskom vojske. Mama i tata su znali govorit nemački pa ni bilo nikakoveh problemi š njimi.  Oni  su voće, povrće i mleko saki dan vozili va vojne kasarni va Maribore. Za sen zadatki upravitelja, otac je šal uzgajat prasci za tov, pa je organiziral klaonicu, topionicu špeha i sušionicu mesa. I vavek je neč dozideval na imanju.

Doma va Kastavšćinu

Otac ni otel budućnost vezat za vojsku, aš su jih puno puti premešćevali, a to bi bil problem sa školun za nas decu. Konačno je prišla naredba da vojna lica ne smeju bit upravitelji ekonomij, pa su ga 1949. leta demobilizirali, ma ga nisu pustili doma, nego su ga opet poslali za upravitelja imanja va Zagreb na Žitnjak. Konačno 1950. leta mu je uspjelo vrnut se doma va Kastavšćinu. Nastanili su se va „novoj“ kuće uz staru nonotovu kuću. Ja san bil va poljoprivredno-strojarskem tehnikume va Vinkovceh, a brat i sestra su šli va Kastav va školu.

 Otac se j’ zaposlil va vojnemu škveru „Viktor Lenac“ v Reke. Nudili su mu mesto direktora škvera 3. MAJ, ali ni bil siguran da bi to dobro obavljal, pa je odbil. Po narave ni težil neken počasnen titulan. Raje se j’ zaposlil va Zadruge Kastav, kašneje pul Jurdanić na poslovima kooperacije sa seljacima. Iza tega je va poljoprivrednen kombinate va Pazine i delal je na osnovanju peradarske farme. Tu je bil do 1960. leta, kada je moral prekinut delo zbog operacije kuka. Ja san va to vreme delal va Plavoj Lagune va Poreče. Trebal nan je iskusan ugostitelj za šefa motela va Limsken kanale i postavili su mojga oca, kade je bil se do 1964. leta, od kuda je radi daljeg problema s kukon šal va prevremenu  vojnu penziju.

Hotel bin pokazat očev karakter na oven primeru. Na Zvankotoven pul Belić ni mogal ostat aš mu nasledstvo nekretnina ni pripalo, pa je kupil staru kuću pul Matuj. Šal je va kompletnu renovaciju te stare kuće i on se sa svojimi soldi i angažiranjen obitelji upustil va to mukotrpno delo. Ni otel zet povoljne vojne kredite za tu adaptaciju, ke je kao borac va rate bez problema mogal dobit. A ni inače nikakove druge boračke privilegije ni koristil on, niti mi njegova deca.

Otac je vodil konobu-gril va Poreče i bil je stručni učesnik va restorane “Kukuriku” va Opatije-Volosken

Iza 1964. leta moglo se j´ otpret privatni manji ugostiteljski lokal. Ja san imel ideju va Poreče va mojoj kuće, va centre grada dogradit svojevrsnu konobu – gril. Predložil san ocu da on prezame to na svoje ime, aš ja san bil direktor turističkega naselja va Plavoj lagune, pa nisan to mogal. 1966. leta smo otprli tu konobu. Bila je to prva konoba va Istroj kade se j’ na otprten ognje roštiljalo i peklo odojka ili janjca. Va toj sezone se j’ delalo jako puno, pa je cela familija priskočila va pomoć. Va mojen poduzeće su smatrali da je to, kako bi se danas reklo, „sukob interesa“, pa san odlučil prodat kuću i konobu – gril. Imel san već pripravan drugi plan. S kujinon san počel na Volosken-Opatije od temelja gradit poznati restoran KUKURIKU. I tu mi je glavna osoba za pripremu mesa za roštilj i ražanj bil moj otac, aš on je bil pravi majstor za to. Onu dobu na oven područje ni niki nudil oštrige va restorane.

Štand na Crekvine

Mane je saku šetemanu s kurijerun prišal karatelčić z oštrigami z Pomera va Istroj. Moj otac je va Limsken kanale, kade se i danas uzgajaju oštrige i pedoći, spraksiral to delo z oštrigami. Moja ideja je bila imet va restorane domaći proizvodi. Klaonica za goveda i drugo blago je bila va susednen Preluke, a dva ribara su lovili ribu za nas. Perad san gojil pul familije na Munah pul materi od kunjadota. Nabavil san sto mićeh pilić keh je kunjadotova mama tovila va njihoj štale. Hranu san z kamijoncinon pripejeval z mešaoni hrani va Pazine i se sam skrcal na Munah. Za prevoz san kupil rabljeni kamijoncin Opel dvotonski, ki nan je služil i pul gradnji restorana. Kako je finjetak i otvorenje restorana kasnilo, trebalo je neč drugo storit s tom peradi z Mun, ko je već preraslo i pojedini pilići su imeli preko tri kila. Ja san to osobno klal, a pomogle su mi čerupat i čistit moja žena i kunjadotova mat. Čisti pilići san zapakiral i pejal v Reku va centralnu hladnjaču zamrznut. Na Belu nedeju tega 1967. leta smo otac i ja odlučili zet štand na Crekvine va Kastve. Postavili smo dve vele bačvi očevega vina na kameni zid odzada, a spreda smo montirali stol z opukami na keh je bil složen veli ražanj s 3 sabji na ken su se vrteliti pilići, odnosno kokice ili purice kako su jih neki zvali.  Na ražnje je se obavil kuhar Ileš, ki je kašnjeje bil kuhar va restorane Kukuriku. Počel je peć prvo polna i ni arival dosta brzo napeć koliko je rabilo. To se j’ tako dobro i brzo prodalo da već pred večer ni bilo ničesar.

Kad već pišen od Kastva, spamećujen se još nečega vezanega za ugostiteljstvo. To je moglo bit kad san prišal z vojski doma 1963. leta. Općina Kastav je raspisala natječaj za iznajmljivanje prostora za oštariju va prizemlje općinske zgrade na Fortice. Otac i ja smo se odlučili prijavit na javnu licitaciju. Bili smo tri ponuđača. Jedan je brzo odustal, a ostali smo mi i još jedna osoba iz unutrašnjosti. On je podizal cenu saki put, i mi smo odustali. Delal je malo vremena i Općini ostal dužan najamnine. Da smo mi dobili na natječaje, moj životni put bi bil šal va neken drugen smjere. Da dodan još i ovo: puno let kašneje va ten je prostore otprl oštariju, pod imenon KUKURIKU, Nenad, sin mojga kumpanjona z restorana na Volosken. San se poškercal da mi je dužan platit autorsko pravo na to ime KUKURIKU. Puno let kašneje se j’ valda spametil na to i daroval mi jenu lepu umjetničku sliku peteha va velen formate.

Va nastavke ću pisat od nekeh zanimljiveh događaji vezaneh za mojga oca. Kad je bil va penzije jeno vreme je otac gojil doma pilići za gril i šal jih je prodavat na rečki mrkat. Pomoć mu je šal najstareji vnuk Gordan. Videli su da se boje i brže prodavaju oni žućkaste boji, a njihi su bili beli. Drugi put se j’ otac domislel da treba očišćeni pilići zamočit va vrelu vodu i oni požuteju. Druga tura ku je prodaval za čas je bila razgrabljena. Otac je povedal kad je bil još mlad je na fešte od Sv. Mihovila pul Rubeš sam je ubil, očistil i na ražnje spekal oko dvajset janjac, rasekal i prodal. Jedino su mu deca vrtela ti ražnji. Niže je i fotografiju kade se vrte ti janjci.

Se ča j’ otac delal

Otac je bil poznat va okolice Kastva kot bekar, pa su ga judi prišli  iskat za vreme svinjokolji. Spametin se kako je va kasele šuril z vrelun vodun zaklanega prasca. Podhitil je pod njega vele verugi, prekoračil kaselu i z virugami va jenoj i drugoj ruke obrnjal prasca i gulil dlaku. To je bilo teško delo, ma on je bil jak pa je to mogal. Onda je prasca zakačil za zadnje nogi z železnen vagiron i z parankunom zdignul tako da je prasac visel. Onda ga se j’ raseklo, znelo drob, polelo s čistun vodun i pustilo ocedit. Za to vreme je gospodarica storila marendu od jetric.

Judi su ga zvali i da njin skopi mladi muški prašćići – nerastići, ča j’ bilo veterinarsko delo. On je to delo sprakticiral za vreme šefovanja na poljoprivredneh vojneh ekonomijah.

Mlevenje batudi z krošun i delavci ki su bili na ten dele

Kroša

Opisat ću ono čega se spamećujem od kroši za mlet batudu i mojmu ocu Iviću. Pisal san već od tega kako se j’ moj otac prvo drugega svetskega rata pa se do 1943. leta uza se drugo bavil i mlevenjen batudi. Glavna makina za to delo je drobilica kameneh bloki, po domaću kroša. To je teška železna makina s velemi čeličnemi usti va ke se hita velo kamene, a železni zubi ga sameju va batudu. Moja mat je vavek govorila da čin Ivić čuje negde krošu, da mu se zajno uše zdignu kot konju. Ta jubav do kroši navela ga je da poduzme neč, na ča se va to vreme (1953. leta) ni baš dobronamjerno gledalo. Želel je prit do kroši, a kako? Doznal je da je negde va Senje, va staren železe hićeno postolje na koleh – glavna usta kroši storena od dva teška kusa železa z razbijenun glavnun  osovinun ka jih pokreće. Otac je ta krš kupil. Spametin se da smo po škuren tiho prišli s kamijonon i se to nakrcali i pripejali Belićen, kade smo onda bivali.

Na Sušake mu je jedan vrsni tokar, kega j’ poznal od prej rata, storil se ča j’ rabilo za popravit tu krošu. Kad je se bilo gotovo otac me je poslal da majstoru odnesen soldi. Kad je se složil i počel delat dogovoril se j’ da će kroša delat na ime Zadrugi z Kastva, aš privatno se onda ni moglo delat. Otac je vodil brigu od kroši i dela i bil plaćen kako su se dogovorili za najam.

Nakon prvega leta studija va Zagrebe san prišal doma na ferije, bilo je to 1955. leta. Otac mi je rekal da ima za obavit neki drugi posli i da ga zamenin na dele s krošun na šumskoj ceste nad Klanun, a potla tega kod Begovega Razdolja. Va našoj familije se ni nikad ocu i matere reklo „ne“, a pogotovo ocu. Tako san bil mašinist na kroše mesto da se kupam va more va Preluke. Napisat ću kako je delo s krošun zgjedalo. Na kroše je delalo pet težaki. Bili su plaćeni po samlevenen kubike batudi. Ja san bil zadužen za krošu i dizel motor ARAN i se ča j’ rabilo okol tega. Pomogal san hitat kameni bloki va krošu, tako da mi nikad ni bilo dosadno. Zanimljivo je bilo paljenje dizel motora ki je pokretal krošu. On je imel na obe strani teška kola – remenice, da bi se mogal zavrtet aš je bil jednocilindrični motor. Motor ni imel nikakove struji, jedino je još imel rezervar z vodun za hlađenje i rezervar za naftu. Kad je jutro motor bil mrzal teško ga se j’ zapalilo, i to je šlo ovako. Najprvo san trebal storit ćiket – zamotaj od komada ceradi debljine cigareta – kega san natopil z naftun i zapalil da se pougljeni vrh tega šćiketa. Brzo ga je trebalo stavit na njegovo mesto i zavidat. Pre tega su težaki na remenicu namotali dugi debeli špag i kad je šćiket bil zavidan, ja san dal komandu „vuci!“. Nikad ni zapalilo od prve, pa je se trebalo ponovit nekoliko puti. To je tako šlo po lete, a va zimskeh meseceh je najprvo trebalo pod motoron zapalit oganj, da se ule va motore i sam motor steple. Komać onda bi se šlo vrtet kako san opisal.

Koliba za težaki

Bez obzira ča je to priča od mojga oca, mislin da će bit zanimljivo prikazat i život i delo va šume. Ča se tiče ishrani i noćenja, bilo je to čisto šumski – jednostavno i praktično. Težaki su zajeno kad smo prišli na mesto kade ćemo kavat kamene posekli potrebnu drvenu građu za kolibu ku su brzo sklepali. Na krov su rastegnuli ceradu na drveneh oblicah, a preko su stavili granje. Krov je bil nagnjen prema nazad tako da je samo spreda bila visina čoveka (priložena je fotografija nas, ku san snimil pred kolibun). Va kolibu su rastresli slamu na koj smo spali, a pokrivali smo se sponjavun. Spali smo va robe va koj smo delali, jedino smo zuli postoli. Pred kolibun su složili ognjišće od većeh kameneh bloki na keh sej’ moglo položit posudu za kuhanje: lonac za jutarnje divka kafe, vela padela za kuhanje pašti, vela sura za friganje špeha, kotlić za kuhanje palenti i emajlirana zdela za salatu. Jili smo z limeneh pijati i za si obroki imeli jednu žlicu. A za rezanje je saki imel va žepe preklopni nožić – takozvan bartolić. Va kolibe na malo povišenen meste je na širokoj daske bila zaliha provijanta: griz od frmenti, ulje, ocat, blok špeha, pašta, divka, sol, cukar, kapula i česan, bocunić z bivandun i boca rakije (za dezinfekciju). Voda se j’ nosila z obližnjega potoka a kruh se j’ naručeval šoferon kamioni ki su vozili z šumi drva va Klanu. Verduru za salatu nabirali smo va kavadanje.

Jedan od težaki je bila zadužen za kuhanje, pa je prej obeda i večeri šal raneje s kavi kako bi skuhal obrok. Jutro je skuhal lonac divki i ofrigal veli kus špeha. Ako ni bilo kruha, je skuhal retku frmentenu kašu, ku je prelel s masnoćun od friganega špeha. Za obed je jedan dan bila palenta z friganen špehon i kakova diva zelenjava, a drugi dan pašta prelivena z friganen špehon. Večera je bila jednaka kod i obed, i se se j’ slatko pojilo nakon celodnevnega fizikanerstva i na friškoj šumskoj arije. Za pit je bila voda, a kadgod i malo domaće bivandi. Za higijenu smo imeli veli kabal pun mrzle vodi, za jutarnjo umivanje i pranje ruk nakon dela. Tako se j’ živelo i delalo od jutra do mraka, dan za danon. Ja san ostal tu delat preko mesec dan, a ovi brižni težaki su tako delali i živeli od proljeća do jeseni.

Da bin prikazal kako se skrbno živelo va našoj obitelji, navest ću ovaj primjer. Taj događaj je mogal bit negde nakon moje sredne školi. Za zimu je trebalo parićat kamion drv za našu familiju, a do drv sej moglo prit na više načina. Onaj najceneji je bilo dobit dozvolu za sječu va komunale i pripejat z unajmljenim kamionom iz šume doma. I jedne nedeji otac je organiziral da gremo va šumu , negde iznad Reki. Celi dan se delalo, a u smiraj dana otac je rekal da remo nas dva hodeć do Reki, a onda ćemo z kurijerun doma. Drugi ki su pomogali su imeli prevoz. Brzo je pala noć i otac ni se dobro orjentiral, tako da smo dugo hodili i prišli va neki zaselak. Tu smo sačekali zadnju kurijeru do Reki. Bilo je već jako kasno tako da ni bilo više nikakovega prevoza z Reki do Belić. Ni bilo druge nego put pod noge, još teh 8 kilometar. Negde na pol puta uz cestu je bil vinograd od nekeh poznateh i otac govori – gremo se osvežit z grozjen. Doma smo prišli jako trudni negde za polnoćun. I kada nan je mat pripravila jist i pit, ja njin govorin da mi je danas rođendan 23.09. Otac se j zdignul od stola i rekal je da mu je to bilo najteže ča je mogal čut, a moja mati je zaplakala.

Študij

Ću napisat neč kako san krenul na študij i kako je tekal dogovor z ocen i materun. Va to vreme san bil zaposlen va tvornice Torpedo v Reke, ki se j’ onda zval A. Ranković. Delal san na montaže dizel motora ARAN. Sličnen motoron san se bakćal kad san delal s krošun. Na ten dele va tvornice san imel priliku napredovat ko tehničar na montaže. Ja san želel poć študirat strojarstvo va Zagreb, ma su prilike doma bile jako teške. Otac je sam delal, bilo nas je šest va familije, a od tega četiri va škole. Trebalo je dobit suglasje roditelji i njihu pomoć, čega san se jako bal. Ni bilo druge nego odvažit se i reć njin. Mat se j’ zabrinula kako ćemo to smoć, a otac je rekal da nimaju niš protiv al su tu još moje mlaje sestri i brat, pa treba i za njih brinut. Rekal san da ću bit skroman i da ću se snalazit s povremenen delon uz studij. Oni će mi dat saki mesec samo dečji dodatak. Na kraje su se složili da gren študirat, aš mi je to bila vela žeja. Jako san se trudil smanjit njin troški. Za vreme ferij na drugen lete študija san šal va Njemačku na praksu kade san bil tri meseci. Zaslužil san za troški študija to leto i priuštil san si dugo željeni motocikl. Kad god san delal i po tri smeni i hranil se vrlo skromno, a i drugi troški su bili minimalni. Pokle finjenega četrtega semestra san šal ponovo va Njemačku i ostal leto dan. Nakon tega san se vrnul, finil študij i zaposlil se va Poreče va Plavoj lagune, najprvo kot organizator športa, a kašneje kod direktor turističkega naselja. Na ten dele pod mojun komandun su spadali dva broda, manji je vozil naši gosti va Limski kanal i jedan veći zvan BURJA ki je vozil turisti va Veneciju. Vodič na ten brode je bil neki Kosta, jedan poseban čovek. Govoril je nekoliko zajiki, a kad je bil mlaji bil je ordonans va spavaćeh koleh na relaciji Beč – Istanbul. Bil je premazan „semi mastimi“ . 1964. Ili 65. leta moj otac je imel velu žeju poć videt Veneciju, ma ni imel pašaporta. Ja san to povedel Kosti a on ga je ubacil va turističku grupu ka gre va Veneciju. I ja san šal šnjimi. Kad smo šli na brod ni bilo granične kontroli, ma za nazad je bila. No i to je glatko pasalo aš je Kosta cariniku neč rekal na uho i mi smo se zikrcali bez problema. Tako je moj otac bil va Italije bez dokumenti.

Negde sedandeseteh let se j’ moglo dobit povoljni bankovni krediti na oročene devize. Ja san imel žeju storit kuću z lokalon (danas bimo to nazvali seoski turizam). Nudila se j’ parcela – senokoša prilično velika četiri kilometri daje od Poreča, va zaselke Kukci kade se j’ već počelo gradit, iako struji i vodi ni bilo. Mane se j’ sejeno zapijažalo, al san otel da i moj otac to vidi i reče svoje mišljenje. Jenega lepega dana san ga pripejal na teren. Kad je razgledal parcelu mi je rekal Ivica to treba kupit. Poslušal san ga i kupil na njigovo ime, aš onda se j’ ograničavalo vlasništvo nad nekretninami. Storili smo darovni ugovor na moje ime i se je bilo pravno u redu. Vrlo brzo je bila ozidana prva faza kuće. Na drugen kraje parceli ozidali smo jednostavnu potleušicu tzv „staru kuću“. Polovica je bila konoba z ognjišćen, a druga konoba za vino, kunelići i kokoše.

Homo univerzalis

Prej nego gren daje opiševat očev boravak na našoj štancije, opisat ću njegovo angažiranje va gradnje. Kako je moj otac uistinu bil „homo univerzalis“, znal je i zidat. Kad smo se dogovarali o načinu zidanja vavek je zastupal mišljenje da bude prirodno u skladu s okolišem. Najprvo smo počeli zidat okol jezerca – bari, zaštitni zidići i jedan veći zid ki je bil i zid konobice. Kamena je bilo dosti na terene i otac je z jenen starejen seljakon zidal si zidi u stilu suhozida. Se je bilo povezano s cementnun meltun, ka je bila z nutarnje strani i ni ju se smelo videt. Kad se j’ storil tarac kod krov od konobice, smo otac i ja ozidali objekat roštilja-ražnja, a zdola je bila krušna peć. Za to ozidat nan je prifalilo kamena i ja san šal z autopriključnun prikolicun va Červar, kade se j’ pripravljala plantaža maslin. Tu je bilo puno kamena od čišćenja terena, tako da san mogal zibrat ča mi je odgovaralo. To kamene se ni lomilo, nego se j’ ugrađevalo bez obradi, a moralo je imet tragi zemlji crljenice. Isto tako smo ozidali portun na ulaze va štanciju naslonjen na kuću. Let kašneje, moj otac ni bil više živ, san šal urejevat okoliš okol moje kuće i okol kuć obedveh sini, aš smo si na istoj štancije. Delali su mi zidari z Bosni. Kad san njin pokazal kako moraju zgjedat suhozodi, rekli su da oni to nisu nikad delali. Ča san mogal, nego jih navadit kako se to dela. Oni su se vrlo brzo uhodali i izvanredno obavili delo.

Moj otac je volel bit na toj našoj štanciji, kade je užival sedet na tronoške uz ognjišće va „staroj kuće“, vavek je neč risal al rezbaril va drve. Radi operiranega kuka ni mogal puno hodit ni stat. Ja i moja familija smo bivali va lepen stane va Poreče. Prišli smo ga sako malo obać, prnest mu ča za jist i neč za skuhat. Vavek je rekal da mu niš ne rabi  aš tu ima se ča mu treba.

Otac je vavek bil stručni vođa

Kod familija smo vavek doma bili angažirani oko tradicionalne proizvodnje, pa je otac i tu bil aktivan. Tako da smo on i ja znali rastranžirat celega prasca, on je meso posolil i sušil na dime uz ognjišće. I vino smo delali. Grozje smo kupili va susešćine, a otac se j’ daje brinul da stori dobro domaće vino. Od dropav je skuhal rakiju va mićen kotle, kega mi je poklonila moja punica. I maslinovo ule smo imeli od našeh ulik, ke je najviše obral otac, a mi smo mu samo pomogli.

Va staroj kuće je otac vavek neč delal i užival uz oganj na ognjišće

Opisat ću jedan događaj z teh dan. Mater od moje ženi ima rodbinu va sele kraj Žminja. Oni su uzgajali prasce za se i za prodat. Ž njimi san se dogovoril da mi dohrane jednega prasca. Prasac je narasal i trebalo je poć knjima i ubit ga. Ja san bil s mojen poslon jako angažiran i vreme je pasevalo. Rodbina zove da se pride rešit prasca i jenega dana otac i ja smo šli h njin da to rešimo. To je blago naraslo na više od 250 kil i to za mojga oca kad je bil zdrav i mlaji ne bi predstavljalo nikakav problem. Ali ja, otac i rojak nismo ga mogli ni dat van z koca. Rojak mi je rekal neka gren po njihovega rojaka i da on ima iskustva. On je prišal z još jenen čovekon i zajedno je rekal da neće bit problema. Va rukah je imel zamku z čelične sajle ku je navukal prascu zad veleh kutnjaki i to mu je stisnulo trubac. Nakon tega je šal van z koca kod ovca. I drugo sej regulalo, a mi smo dve polovice prasca pripejali va  našu štanciju i regulali sve ča ju nužno s takoven meson.

Po zime je otac bil na štancije najviše sam, a po lete je imel društvo. Moji prijatelji penzioneri z Njemačke su bili tu po dva meseca. Doma, pul Matuj, naša mat je vavek njurgala kega vraga Ivić dela va onoj „divljine“ kade je škuro i samina. Onda još ni bilo javne rasveti ni kuć okole. On je sejeno užival, aš je bil čovek od prirodi, a to mu je bila prilika za to.  Po lete smo imeli saku nedeju nekakovu feštu, a i va šetemane dokle se j’ kuća delala. Moj otac je bil vavek glavni za pripravit, bilo da se j’ pekal odojak, janjac ili roštiljanje. Ja san va to vreme bil direktor turističkega naselja Plava Laguna i va naselje je bil noćni bar z internacionalnen programon, jedini va Istroj. Par sezon je va bare nastupal francuski komičar Adelio i vavek je prišal svojun ženun, nadobudnun Parižankun, ka je bila š njin po celoj Evrope. Bila je dobra kuharica i vavek kuhala za sebe i muža. Jedanput mi je rekla da ča se mi busamo svojun kuhinjun kad ona ni niš posebno jila pul nas. Malo me je povredila i san ju pozval h sebe na piknik i rekal ocu da mora na ražnje speć odojka i tri patki, ke smo sami gojili va jezerce na štancije.  Napomenul san mu da to mora bit najboje ča se more storit, aš moramo branit „naše boji“. Se j’ bilo savršeno, tako da nas je gospođa Florans pohvalila i rekla da će sen reć kako se uvdeka jedino pul Kukurina dobro ji. Bilo je veće društvo, i si su se s njun složili. Da bi nan se odužila, pozvala je oca i mane va apartman, va ken su oni bili smešteni i storila izvanrednu francusku večeru i još jedanput zahvalila na odličnen jelu kod nas na piknike.

Par let nakon operacije kuka otac je se teže hodil. Vozili smo ga va toplice va Topusko, va Istarske toplice i poznatemu specijaliste va Ljubljanu. To mu ni niš pomoglo, pa su mu predlagali ponovnu operaciju, do ke ni prišlo.

Otac je svoji radovi zval “Matuzići”
Očevi slikarski radovi ke je risal z mašti

Matuzići z drva

Otac je bil delavan i vavek se j’ moral z nečeren zanimat. Našal je zanimaciju, kako bi on rekal, va izrade „matuzić“, tj. drveneh figuric različite veličine i izgleda.  Čin je videl komad drva, storil je od njega figuru, i nijene dve nisu bile jenake. Bil je jako produktivan i rado je poklanjal ti matuzići nan va familije i svojen ili našen prijatelon. Ja iman okol trejset različiteh figur izloženeh na gredah va dnevnen boravke. Te figurice su bile više puti izložene pul Matuj i va Kastve. Pul Matuj mu je kustosica z Rečkega muzeja, pok. Vanda Ekl, otprla izložbu i pohvalila njegove rezbarije, za ke je on vavek govoril da mu to ne zgleda kod umjetnost, nego mu je to zanimacija za pasat vreme, i pričinja mu velo zadovoljstvo kad more to nekemu poklonit. Bil je nadaren i za risanje suhemi bojami i va akvarelu. Va živote je imel samo dva perioda kad je imel vremena za risanje. Prvi je bil na odsluženju vojnega roka, kade je bil va komande mornarice radiotelegrafist va Tifte. Drugi period je bil kad ni mogal već hodit zbog kuka. Ja iman nekoliko njegoveh slik, tipa naive, ke je vavek risal iz mašte. I te sliki je jako rad daroval sen okol sebe.

Naš otac Ivić i mat Marica z vnuki kada su bili mići i veći

I na kraje ovega spamećevanja na mojga oca, ča reć? Ma mislin da san puno rekal va ovoj priče, ali verovatno ne se. Finit ću z napisanemi besedami mojga oca va njegovoj biografije: „Skupa svojun ženun izgradil san četiri veli, vredni neoboderi – to su naša deca i njihove familije s kemi se jako ponosin. To je najveće bogatstvo ko san mogal poželet“