Kako od Velega storit mići vrh, i obratno

Vrime pasje, i dok pasi uživaju – nas strahon ubijaju !

Piše: Žvan Sušačan (Ivan Gračanin)

Pokle neznamo koliko već sedmic, kišnih i sopet kišnih je pasalo,  sramežljivo je zimsko sunce kroz teški oblaki samo malo pošpijalo, smo se nas dva, grdo je reć, stari, a lipje je reć, z puno desetletjih na škine, otpravili na zrak.

Rika, grad ki teče, ima prekrasnu okolicu, ćeš uz more, ćeš na zgorun, a naša je omiljena ruta ona za Veli vrh. Našen ‘aviončiću’ najdemo mesto va dolnjen Pulcu, al’ Drenovi, i onput, ‘remo zgorun hodeć, po putu ! Put je to do vrha Velega vrha kega krasi Crikvica, nakon ukazanja Majke Božje domaćen čoviku, obnovjena, pod kraj pasanega milenija. Osin sega, vuče nas tamo i ta hodočasnička nota.

Veli vrh (foto: rijeka.hr)

Po snežnen zraku, aš Gromiške alpe su se dobro zabelile, a bura škura i mrzlinu i zimski dah zgora donosi, na putu za Veli vrh, vikend je, a jako malo judi!. A med retkimi ki su tu bili, prevladavali su mladi z pasimi, i oni svetogrđen ‘okićeni’ aš najveći del tega, hodočasničkega puta, vozeć se va limenih škatulah, i zraku i hodočašću su ‘rogi pokazali’!

Gromiške Alpe

Gospa va crvenen kapote, mlaje srednje dobi me zaprosila… da ako znan kada je Crikvica zgrajena?. Ja, drugi svjetski rat, vojska talijanska,… a nakon pada ‘Berlinskega zida’ viđenje, i obnova va značajnen desetletju kada zemjon Hrvackon, med i mliko teć počeli su… Onput mi j’ crvenokapotna rekla da je Crikvicu oslikal Aleksandar Zvjagin,… Ma vidi, ona puno više o Crikvici zna, i leh je, na ovoj mrzline, valjda iskala nečigovu besedu da se malo ugrije.

Crekvica Veli vrh (foto:Coolinarika)

Pak mi je još rekla da je obnovjenu Crikvicu posvetil plovan z Donje Drenove, ki da j’ pred par dan umrl, od korone! – A koliko let je imel? , brzo san pital, aš takovu priliku mi HRT – nikad ne bi dal!. – Va devedeset i drugoj, je rekla crvenokapotna. Hopla! Obrnul san se mojoj staroj i rekal:

– Potpišimo se zajno za partencu va devedeset i drugoj, pak neka onput zmišjaju i nazivaju virusi kako jin je mila i draga voja!

I na zdolun sopet više onisteh ki gaze, aš sede va ‘limenkah’, vlastiti imunitet, i sopet divojke i mladići, oni na prage živjenja odrasleh, ma još vavek z njimi su samo – pasi! Slika seprisutna, ma ne samo na staze idealnoj za jačanje imuniteta, idealnoj i za zazivanje Majke Božje da nas spasi od vele ove prevare – plandemije…