Sokratova štorija z verun va boje jutra

Piše: Cvjetana Miletić

Tiha noć… Tiha i snežna.

Vane se pletu pršak i vetar, a zima ujida.

Lumini gore i svetla na oltareh. Pobožno se ruki sklapaju. Teče Božja šetemana. 

Otajstvena noć podarila nan Sina začetega po Duhe Sveten.

Otrok, rojen va Božiće, sobun je prnesal i Božju jubav. Sakemu sledić.

Bože moj,

neka Ti ne budu preteški grehi naši i oprosti nan se one bedastoće ke storimo va neukoste svojoj. Navadi nas volet. Onputa ćemo, takovi kakovi smo, bit sled boji i svojen i tujen. Pokaži nan svetlobu va koj počiva mir naš sakidajni i pomori da najdemo sami sebe. Podaj nan ruku da ne pademo saki put pod križon živjenja, i mi ćemo svoju podat onen do sebe, i tako splest kolo okol Tebe za vjeke vjekova.

Tiha j’ noć. Zimjiva i snežna.

Čoveku va takovoj noće čuda tega prihaja namisal.

A ki put je dobro i storit račun za videt ča nan to rabi a ča ne?!

Jena takova štorija više mi j’ puti pomogla, a dogodila se starogrčkemu filozofu Sokratu. Sokrat je živel od 469. do 399. leta prej naše eri, a umrl je od otrova kega j’ moral popit kad su ga optužili da kvari mladež i da ne veruje va državni bogi.

Jedanput da j’ Sokrat stal pred krcaten bankon na ken je bilo posloženo more stvari za prodat. Stal je i gledal, gledal i premešćal se, pa opeta gledal… Potle nekega vremena lih da j’ rekal: “Bože, Bože, koliko je tu stvari, ke mi nanke ne rabe!”

Tega se saki put domislin dokle gledan naši izlogi. Nutreh sega i sačesa… a čoveku tako malo treba!

Na stole se studi friška pogača.

Teplo diši kuhano vino s garofulići.

Pod krizbanon va jaslicah smeje se Isusić. Jas se smejen belemu kruhu i novemu letu.

Jutra ćemo zajist prvi kus Novega leta va ko rabi poć z miron va duše i z verun va boje jutra!  

* pršak – sitni zrnati snijeg; ujida – grize hladnoća; lumin – žižak; sakidajni – svakodnevni; banak – tezga; garofulići – klinčići; krizban – božićno drvce

Odgovori

Vaša adresa e-pošte neće biti objavljena. Obavezna polja su označena sa *