Tergadba va Vrbniku nigda i sedaj

Piše: Marija Trinajstić Božić

                               Bili su zadnje  teple dani pasanoga Mihojskoga leta. Vrime teplo, ma če teplo, preteplo. Moje kunpanjice su se jošće na Zgribnici kupali. Ja sen sidela z  vnučići  na Škujici pelnoj  nike fureške dice ki su prišli z brodićen od Gorinjega kraja. Dica su po dičju zijali, nazivali se i pogovarali…..“Kaj si to kupil?“! Pod Škujicun su vervoreli judi, hodeli zgoru-zdolu, nosili butije vina, gjedali nikakove harti, mej sobun govoreli i „bitte“ i „please“. Majko Božja, ki šunšur, seke sorti zajik !

                                Ta šunšur na Škujici i šoto nje mišal se je z bukun trahtori ke su hodeli i Grad i Namori, aš tergadba je veće bila počela. To je pek štorija od fugi, nervožarije, parićivana i – da vo plovan ne vidi – kadagodare od kjetav. Poji pelno trahtori i seke sorti aut, judi mladih, starijih i dice, samol ni vidit kareti ni živa ke jih pejaju. Stariji  su va velon deli, dica se i zateku  jeden za drugin ako jih nijeden ne vidi. Berzo tergaju, napelne kasetice, hitaju va trahtor i pejaju doma al va Zadrugu.

                                  Ma vernimo se malo sedaj va mislih  pedesetek let nazad…..

Škujica prazna, šoto ni auta ni trahtora, kagodare starija ženska pasiva, kagodare mat peja picno dite, aš drugi su  Poji. Ma jošće malo, aš već je čut kareti, dva mulca il osel i mulec jih potežu. Čebri na njih kanpanaju. Na bacijolcih su obišene bisagi ze praznimi kjantami i vernja do provesla kercata grozdova. Belo, černo, žlahtina, ruža, brajdica, sansigot….Otec peja karet po Gradu do svoga dvora sprid konobi. Karet se je fermal, živo je otpejano va štaju, a težaci su šli na obed i čas počinut. Dokli njih ni, dica se deverte i sirgaju na kareti, potežuć ojić i mičuć četvoricu. Bisagi i vernja z grozdovin veće su  va kući, a va čebrih na kareti ozgora grozdova jošće je vidit sparožinu ka će potli rabit va konobi. Ondat je počelo roštani makin za mlit grozdovi, a potli se je mest zinesel va čeber na pokladih va konobi…..

                                A prija makin za mlit grozdovi, forši prija šezdeset-sedendeset let, grozdovi se je z nogami gazilo va čebrići, mestilo se je,  čega se Novjani, naši susedi priko mora, šenpre domisle na svojih feštah.

                                Mi se toga domislimo čitajuć knjigu verbenskoga meštra Ivana Žica Narodni život i običaji u Vrbniku na Krku, str. 466: „Grozdovi pobiraju va vernjicu. Kada je pelna nose ju na uzrati i onda stresnu grozdovi z vernjice na kup, ako ga meste va mesti. Ako ga ne meste va mesti, ontrat ga nose ven po lazi i stresaju va čeber na vozu, ki stoji pred lazun. Kada meste v mesti, gone doma mest na živi va mihih, a mihi sprazne va konobi va okrut. Kada tergaju na voz ontrat meste na placi ili va dvori, ako moru z vozon va dvor, i mest nose va keblih va konobu.“

                              Ava, ma bimo mi denes mestili da niki ni zmislel makinu za mlit grozdovi…..! 

                                                                                  

                                                  Vrbnik, rujan 2020.

Manje poznate riječi

Mihojsko leto – topli dani oko blagdana sv. Mihovila koji se slavi 29.rujna

Škujica –  trg u Vrbniku

zajik –  jezik kao tjelesni organ, strani jezik 

fuga  – žurba, hitnoća

parićivani  – pripremanje

plovan – župnik

karet  – zaprežna kola koja vuku mula i/ili magarac

čeber  – otvorena drvena bačva /bez gornjega dijela/

kjanta  –  staklena boca opletena slamom

osel  –  magarac

bacijolec  – tanki drveni kolčić za ograđivanje četvorice – drvenog dijela kareta

proveslo – ručka za nošenje košare, uglavnom drvena ili kante, uglavnom

                   metalna       

ojić  –  ruda na zaprežnim kolima

četvorica  – četiri kotača međusobno povezana i s gornjom daskom čine osnovu

                      zaprežnih kola

mest  –  mošt

pokladi  –  dugačke drvene daske-grede na kojim stoje bačve u konobi

mestit  –   gnječiti grožđe nogama

uzrati  –  neobrađeni dio na početku ili završetku obradive površine

voz  –   zaprežna kola – karet

laz   –  ulaz u vinograd ili pašnjak zatvoren trnjem ili granjem

mih  –  mijeh, vreća od nepropusmog platna za nošenje grožđa ili drugih tekućih tvari