Bela nedeja i va korone

Piše: Tatjana Udović

Kako su se manifestacije ovo leto al otkazane al se održavaju va manjen obime, tako će bit i z najvećun kastafskun feštun. Bela nedeja će se obilježit na simboličan način z reduciranen programon ki će durat tri dni, pod epidemiološkeh uvjeteh.

Od 3. do 5. 10 va Kastve će se moć provat mlado vino, kako ča je to i užanca, ma program i ponuda će bit drugačji, bez večernjeh dogajanji i bez koncerti.

Grad Kastav odlučil se je na dnevni program ki će durat od 10 ur jutro do 9 večer, a ponuda na štandeh bit će skromneja leh ča j’ to bilo pasaneh let. Za ugostiteljski del pobrinut će se kastavski ugostitelji.

Kako bi se šetnja gradon maksimalno prilagodila epidemiološken uvjeton, na Belu nedeju će se prihajat i odhajat po odvojeneh puteh. Sajmeni del ponude organizirat će se od Trga sv. Lucije prema gore uz propisani razmak med štandi.

Punkti na keh će bit ugostiteljska ponuda su Belveder, Fortica, Trg Matka Laginje, Lokvina i Crekvina. Si ugostitelji će imet barski stoli i klupe kako bi se izbjegla gužva na šankeh.

Bela nedeja 2020. odvija se pod visoken pokroviteljstvon predsjednika Republike Hrvacke Zorana Milanovića, a organizatori su Grad Kastav i Turistička zajednica Grada Kastva.

Odgovori

Vaša adresa e-pošte neće biti objavljena. Obavezna polja su označena sa *