28. Grobnička jesen – od 22. 9 do 11. 12.2020

Piše: Tatjana Udović

25.9.2020 – Kaštel Grobnik – Otpiranje 28. manifestacije Grobnička jesen

Temeljne zadaća Katedre čakavskega sabora Grobnišćine je da prezame brigu o Kaštele i da grobnički Kaštel učini znanstveno-kulturnen centron Grobnišćine, ča uspješno obavja već više od 28 let. Kako je Katedra osnovana va cilje zaštite, očuvanja i promicanja zaštićenega kulturnega-povjesnega dobra RH – kaštelskega kompleksa Grobnik i drugeh vrednosti i posebnosti kulturno-povijesne baštine Grobnišćine, z kemi kraj obiluje, Sabor ima obveze celo leto. Rabi reć da je Grobnička jesen značajno doprinijele zaustavljanju propadanja Kaštela Grobnik. Programi od početka Grobničkeh jeseni ukjučuju više tisuć sudioniki, većinun dece i mladeh.

Kaštel Grobnik

Grobnička jesen je prva Katedrina vela  manifestacija ka dura od 1993. leta., a programi se sako leto uspješno provode od 9. do 12. meseca. Ovo leto radi epidemiološke situacije, za 28. Grobničku jesen parićat će se oni programi keh je moguće provest uz epidemiološki uvjeti.

Grobni nalazi z nekropole Grobišće, foto R. Gropuzzo

Va sklope 28. Grobničkeh jeseni, va Galerije suvremene umjetnosti otpret će se dve izložbi., 25.9.2020 na uru zapolne: 

– ŽERAVICE 2020. – izložba razneh stvari z povijesti i prapovijesti, najdeneh na nekropole Grobišće i drugeh lokacijah. Program ki grobnička Katedra organizira  va suradnje z  Pomorsken i povijesnen muzejon Hrvackega primorja va cilje upoznavanja šire javnosti z delon bogate grobničke prapovijesti i povijesti, ukjučujući i mač z legendarne bitke na Grobničken  poje 1242. leta. Izložba obuhvaća i niz drugeh čuda zanimjiveh predmeti- vredneh tragi našeh davneh predak, od nadugo poznate grobničke sedie, do sakakoveh  predmeti za rabit, prapovijesnega nakita itd. 

Nekropola Grobišće, istraživanje 2019. godine (Arhiva PPMHP Rijeka)

ARTOTEKA GROBNIK – četrta izložba va nize predstavjanja umjetničkeh djeli ka stoje na raspolaganje za iznajmljivanje va za sada jedinoj posudionice umjetničkeh djeli va oven dele  Evrope. Do sada su preko 460 djeli grobničkoj Katedre darovali umjetnici z Hrvcke, Italije, Slovenije, Austrije, Nemačke, Švicarske, Nizozemske, Francuske, Mađarske, Makedonije, Bosne i Hercegovine, Poljske, Španije, Argentine, Brazila, Čilea, Japana, Kine… 

Artoteka Grobnik – Grobnička Katedra

Ove će dve izložbe bit otprte od 25. 9 do 30.10.2020 radnen danon od polna do četire zapolne, subotun i nedejun od dve do pet zapolne, a za organizirane skupine kako i vavek– po dogovore.

Ostatak programa bit će najavjen naknadno.

Mapa Gospoštije Grobnik