Ćakule sakidajne

Dogodi mi se tako da san sama, naslišan tišinu i tići pa se ćapan za telefon kako za spas.

Iman tri kujine s kemi se redovito čujemo. Ku ću prvu zvat? Ala ću ovu ka je najbliže, ona će mi ča povedet.

Dobro jutro. Si mi ča?

– A tako, tako. Nisan bogznača ne, a ti?

Dobro san, samo me ni jako niš voja.

– Tako ti to pride, lepa moja, kada svojga para zgubiš. I se ča daje će ti teže bit. Si bila ča na cimiterere?

San. Imela san lepe gradijole pa san nesla.

– Kako si ti fanjska! Si mi pogledala ako j’ na mojeh urejeno?

Je, je se ti je kako trebe.

– Si čula, ti ćeš ga poznat, umrl je oni Marijo ča j’ bil šofer va Trgovačken.

Ne, ne poznan ga.

– Morala biš znat, žena mu j’ bila konobarica va Slavije

Ne, ne bin znala

– Kako ne znaš. Bivaju na Vrutkeh. Sestra mu je jena visoka suha, vavek je po Mrkate.

Ne poznan ti ja ti Opatijci, nego povedi ako ča znaš od Leprinčani.

– Da ćeš dobit novi susedi

Ki?

– Znaš oni kega je bila žena pustila, da ima sada frajaricu, neku Brešćicu. Najbrže da mu j’ noseća i da te prit bivat tamo nejde blizu tebe.

Ni to nisan znala

– Se ti moran povedet

Zato te i zoven. Drž se pa ćemo se još čut

Sada mane zvoni….

Halo! Si to ti?

– San, zoven te da ti rečen da gledaj večeras film na drugen. Ja san ga gledala. Jako dobar!

Ću. Ča delaš?, Ča ćeš kuhat? 

– Moji su mi privukli svega i svašta. Rečen njin ne nosite toliko, a kćer reče – ovo je bilo na akcije, ono je bilo na akcije. Nego, imaš katalog od Lidla? Sega je! Moraš provat jene konbasice. Odlične su!

Je te strah Koroni?

– Bome je, ča bi me bilo strah. Neka nas straše, ja jih već ne naslišan.

Reš kamo s kući?

– Ren. Spravjan se va knjižnicu. Pročitala san tako napetu knjigu. Baš me je vuklo čitat. Moran poć drugu zet.

– Nego, si se ča čula z onun tretun. Niš me ne zove.

Nisan već fanj vreme, baš ću ju sada malo zazvat.

Si živa? Kade si da te ni čut?

– Ča će me bit čut kad san skroze po duhtoreh. Neč mi se je hitilo po kože. Već su mi tri leki promenili i nikako pasat. Tlak me gnjavi. Skroze merin. Sad je nizak, sad je velik. Po noće se stanen pa merin. Iman kup lekarij. Naši mi zmeraju da tega preveć pijen. Ja san njin rekla, deca, da ne pijen ti leki bite me mrzlu našli.

– Kako su tvoji? Kako su deca? Ste si dobro?

Si smo dobro. Prit ću te morda malo videt jedan dan.

– Daj, ma zazovi prvo da ne prideš na zaprto. Aš ja san ti saki dan al va ambulante, al va farmačije. I jutra ren, te mi cukar merit.

I tako mi z šetemani va šetemanu i z dana va dan ako rabi.

Darinka Martinčić