Nono je povedal

Sen ki se boje da će se od starine bit pozabjeno kad stareh više ne bude, teplo preporučamo ovistu štoriju ku j’ pred pet let napisala učenica šestega razreda Osnovne škole “Vežica”, Lea Vasilić. Ona j’ se neš od svojga nonića čula i navadila pa će njoj od tega neke besedi i sliki trebeda zavavek ostat:

Nono je povedal

Kada gren kod nonića, moren, kot doma, gledat TV ili poć na kompjuter. Moren i naštampat ku moju sliku, rabit telefon, mobitel, ali kućni. Ma kada mi to dodija, išćen da mi malo povede kako je njemu bilo va leteh va keh san ja sada.

To su bila leta kada se ni živelo kot sada. Sega je falelo. Kad je letrika došla, imeli su samo žarulje i niš drugega. Frižideri ni bilo. Va kuhinje je bil šparhet na drva. On je rabil za se: kuhat i vodu teplit i po zime za teplit kuću. Vode, kako danas, ni bilo. Rabila se šterna i kalala se va bujolu voda. Za kuhat i prat se. Moralo se i šparat vodu, aš je znalo prefalit. Bujol je bil vežen za špag i prehićen na koloturu. Kad se ni bilo atento, špag je znal pobić va šternu. A onput se moralo z nečin, za ča je bilo zakačeno više velih udic, doma načinjenih, ćapat i potegnut bujol vanka. Za prat se, bil je lagaman. Kupat se, kako danas, ni se moglo. A ši, kad je bilo sušno leto, moralo se poć po vodu na selsku šternu va mesto.

Za kuhat su morali imet drva i prašće za snetit! Ali drva se nisu kupovala. Ki je imel svoju šumu, dopeljal je svoja drva. Ki ni imel, moral je poć sić drva i nosit ih doma. A to je bilo fanj za hodit! Za nosit drva rabila je plašćenica. Dva široka faša, na ka se složil naramak drv!

Po lete se stavil stol na privrat za večerat. Bilo je škuro pa je važgana petrolejka. Za večeru se jila, skoro vavek, palenta-golica ili krumpirica, frigane slane srdele i kiselo mleko ali škorup. I si su bili kuntenti.

Večeri su bile mirne, čul bi se kadikad cug ki je pasal. Naslihali su se šćurci, kada je bilo jako teplo. Igralo se na karti, briškula ali trešeta. Pil se frambov ali limunada. Boca kruškovca durala je celo leto. Za blagdani se kupovalo vina. To je bila fešta.

Va vrte okol kuće se kopalo aš zelenja ni bilo za kupit va butige. Sadil se krumpir i broskve. Nono bi rekal: “Blažene broskve i sada mi gredu na nos vanka!” A ja, i mošnjic je bilo fanj. Ma tikve, kukumari, pomidori, toga ni bilo, ali su bili retki.

Zapolne, na tri ure se kuhala cikorija-divka, z mlekon i jil se gol kruh. Črnoga kafa je bilo jušto za blagdan. Kafe se kupovalo va zrnu, broštulalo, čuvalo da ne prismudi, i mlelo se va starinsken mlincu. Kuhalo se za gosti aš je rabilo bit šparan za se, da se kumpanija i fameja lipo naji. Onput se pil onaj kruškovac. Meso na stolu se znalo nać, ma fanj retko. Delal se žvacet i mesili njoki. Bilo je i pašti polevene. Od slatkega se pekal študel, pita i frite.

V Riku se vozilo cugon. Hodilo se do štaciona, kupit kartu i čekat na stanice kada će cug z Oštarija. Do Rike se vozilo malo manje od pol ure. Na Pećinah bi se kalalo. Još ni bilo busa, cug je bil jedini mod putovanja.

Nedilju su neki hodili va crikav, ma ne si! Ali su se zabavili na balotah, popili biru, bevandu, al narančadu. Ženske su mećale i rušile čune. To njin je bila kuglana. Tako je bilo sred pedesetih let potle onega rata.

Onput se počelo vozit kurijeron, kupovat radija… Još i danas nono ima Savicu. Došla je tekuća voda, delale se kupaone i rušili vanjski kondoti. Bili su i frižideri, rešo na letriku. Drva se počelo kupovat, ni više rabila plašćenica, a arivali su i televizori.

Negdašnja lipota života na selu se zgubila. Navade su se promenile, živelo se boje. Ja ne znan kako bin ja mogla danas ONAKO živet.

Lea Vasilić, 6. r. OŠ “Vežica”