Zagrad pred sto let

Zagrad je del Leprinca, a najlepče ga je videt baš z vrh Leprinca. Ako reste s cestun od Zatki proti Tumpićen, prit ćete do Staji. Nekada je tu bilo mesto za počinut juden i blagu ko je vuklo vozi z oveh kraji preko Učki v Istru i nazad. Na ten meste je sada ravan i teren za mali nogomet. Od Staji do Zagrada i Vedeža  probijen je va staro vreme kolovoz, put po ken je mogal pasat voz s konji, a danas je to asfaltirana cesta. Do kuć ke nisu pul puta, pejale su staze široke toliko da se more pasat z bremenon. Danas ni kući do ke ne more prit auto.

Va sred sela je bilo i još vavek je par kuć na pod. Druge su bile najveć pozemujke. Samo neke kuće bile su pokrivene z žlebci, a čuda kuć, štale i skadnji imeli su slavni krovi. Zagrad se je raširil. Storeno je čuda noveh i lepeh kuć. Okolo kuć, namesto vrta, gleda se uredit jardin, a mesto žira sadi se ukrasno drevo. Ki zna mesta, re va umejki još samo za lukići, a va goru već ne re po niš nijedan. Nekada je bilo manje kuć, a više judi. Selo je vrelo od živjenja. Današnje vreme, ograjeni z živicun i zaprti mej svojemi zidi, već skoro da ne poznamo ni prvi susedi.

Leprinac

Dvajsete leta pasanega veka….

 Va Zagrade je devetnajst numeri, a žive okolo sto pedeset judi. Nijedan ne dobiva ni plaću, ni  penziju. Žive se od onega ča se doma zgoji. Od blaga još samo neki drže ovce. Od kada se da mleko prodat judi se više nabavjaju krave. Zgoji se i prasca. Obdeluju se si dolci i lešice. Za moć ukrast kamiku pest zemji, ziju se prezidi. Umejki su pograbni i pokošeni. Ča se ne da pokosit, ženske obžanju. Saki štrped i saki kamik. Suhole i prašće prnese se doma za netit.  Do solda se pride jedino z prodajun onega ča se da prodat furešton i gospode opatijskoj. Mladići, za solat zaslužit redu po žurnadah, a najveć dela je doma, va grunte. Parićat je i drevo i prnest ga h kuće. Ženske su težakinje i mlekarice. Dopolna redu zdolu z bremenon mleka i placi, a zapolne, ako nisu po lehah, zanesu v Opatiju na kvarter još i koš drv rascepaneh. Prevoza ni nikakovega. Sakamo se re hodeć, a se ča rabi prnest i odnest, da se na plećeh. Aš tovara hranit se ne splati.

Judi spašuje gora, šuma i senokoše, lov, lukići, majuge… Z gori se privuče dreva i sena. Va bukovoj šume, va štajone od bukvice, love se puhi. „Krhko drevo bukovo, slatko meso puhovo.“ Skoriste se i kožice. Osuše se i prodaju v Reku čoveku ki jih predeluje za pelicu. O pozimke su leski puni lešnjaki. I osušeni lešnjaki daju se prodat va pašticeriju. Va osmen mesece, va štajone od majug poć je proti Učke iskat dolčići va keh raste majugovina i nabrat zreleh majug. Malo franboba skuha se za doma za slučaj boli, a drugo se proda. Po umejkeh je so leto lukići, od Petrovi do mraza. Raneje boje da jih ni aš da je prvo Petrovi boje videt hudića, nego lukića – znak suši. Boji lukići se nesu na placu, a huji parićaju za doma.

Marunove šume

Na saken posese, po lehah i mej kućami je više al manje žira – črešanj, jabuk, oreh… Zagrad okružuju marunove šume – Žigujevac, Zadušćina, Plovanski Dol. Od maruna je i najboji zaslužak, da se familija malo zapomore. Ča se ne proda doma trgovcu, zanese se v Opatiju pa z vaporon v Reku, prodat i zajeno neč ča kuće rabi prokurat. Kroz leto se najveć kupuje sol i petroja. Se ča se mora kupit trebe jako, jako šparat.

 Najveći zator za saku familiju odvavek je bol. Po duhtora se gre va krajnjoj potrebe, čuda puti i prekasno. Kega bolnica toka, temu re krava z štali. Za „anjelići“ se ni ne bacela previše. Va sakoj familije je neki od braći ki j’ mići umrl, i ne samo jedan. Kad otrok umre se reče „Bog ga j’ dal, Bog ga j’ zel.“  Neki od familije stavit će na rame kaselicu i zanest ju zakopat na del cimitera za anjelići. Kada starac odnemore duri pul ognjišća i čeka da se i njemu Bog smiluje.

Nonica i nonić (preknonoti autorice)

Umret da se mora, ma i živet je. Mej kućami i po puteh judi se pozivju, ćakulaju i škercaju. Deca poleću po vane z razbijenemi koleni, plaze po dreve i vavek jih je kup va igre. Drži se do suseda i do roda i sakamo se ariva. Sako selo ima svoje stočišće, mesto al familija kade se judi najdu za povedet jedan drugemu ča su čuli i doznali. Poveda se od skrbi, ma se rado pride i na pogovor od judi, kemu se more ča prišit i narugat za nasmet se.

Vidulica i preslica

Zimski štajon muli se fažol i frmenta, prede vuna i pletu kopice. Divojke pri lampe rikamaju dotu. Ki ume, zasope va vidulice, a i zakanta se po starinsku „na tanko i debelo“.

To je moj Zagrad pred sto let opisan onako kako san čula povedat od starejeh. I štorija od živjenja spodobnega po suda po vanjšćine va ono vreme.

Darinka Martinčić

Odgovori

Vaša adresa e-pošte neće biti objavljena. Obavezna polja su označena sa *