Ob košnje

Pokle kopi najveće delo na kmetije pride košnja. Saki numer imeval je budi ča od blaga. Kravu, tovara, par koz. Jednako se’j bacelalo spravit za zimu, kako hranu za familiju tako i krmu za blago. Uževalo se’j reć – ki ob Trih Krajeh ima pol hrani i pol krmi da’j dobar kmet.

Za poć h košnje, koliko’j značilo bit dobar kosac toliko’j bilo trebe imet i dobru sprav. Par kos proti trenu i sorte travi i jušto toliko brusi. Sako leto rabilo je prokurat i ča novega. Kose i brusi kupovalo se j’ najveć Opatije va železarije na mrkate, po nekadajnu Pul Simpera. Kega pogovora okol tega kakov mora bit brus, a kakova kosa. Ako’j pretrda neće rezat, ako’j premehka trebe ju’j zakalit, a i nasadit ju’j trebe znat. Moraš znat zibrat i brus, da j’ od pravega kamika i dosta jut. Tulci su se delali od žukovega dreva, a kosje od topole al jelvi da bude lahko. Ricji jesenovi, storeni za prijet kosu v ruke, jušto kako trebe. Pravi majstor za storit prva klas tulac i kosje, bil je Bučić od Andreti.  A va svoje vreme, poznati i štimani zagrajanski kosci bili su Ive Katićev, Ive Ćukov, Marko Prorokov… 

 Vedežani i Zagrajani: Milenko Golčev, Tonić Šćurkov, Ivo
Benašov, Ive Jožetov i Tonić Kosićev

Da se kosa more lagje nabrusit mora se ju najprvo nakjepat. Još vidin oca k’večeru va rebrice pred skadnjon kako j’hitil natla za sest staru jaketu, zabil želesca va zemju, stavil oćali i z napošnen batićon šal kjepat. Onako po takte tuče i tuče po oštren od kosi dokle god ga ne posluša. Od drugega orudja čekale su parićane vile i grabje. Ako’j otpal ki zub na grabjah, ako’j bilo brno napuknjeno al grabjišće zgobjeno, to se’j već po zime popravilo i novo podelalo.

Ni s kuhinjun se ob košnje ni šparalo. Postoji stara parola – Kad se kosi, nek se mrsi! O Vazme se’j vavek načela špaleta, a ob košnje pršut. O mlade lete smo nastavili kvočku na jaja i vavek se’j zleglo više petešić nego pišćenic, pa su tako i ti brižni pulaštrići finili va gulaš za kosci.

Bendima j’ od košnji! Pokošeno j’ se okol kući, zaten pustoše i dolci, a najzad i si umejki. Ma ni finjeno, komać nas prava čeka. Poć je na Sapca. Naše senokoše su na Maleh Sapceh na par ur hoda od kući.

Misli mi se vrnjaju va ono vreme. Gore se već kosi. Mama i ja nesemo obed. Remo zgoru preko Starčevega Dolca, Grižic, Carevca i Antonovca. Komać san čekala prit va bukovu šumu, va Lazi. Potloh trapid od veja, a kad pogledaš vajer ni kušćića neba, samo zelenilo. Sako malo videt je senjal od majugovine, a va gubeče se najde i kakova modrijanka. Najedanput ćaradura. Rebri, dolčići, brežići. Male Sapca! Ćuti se dih pokošene travi i čuju glasi brusa kako tanca po kose. Žiga, žaga – žiga, žaga!

Kosci su krenuli rano jutro za tretun urun da moru redi dnevon počet kosit. Sapačku travu-vučicu kosa najboje reže dokle j’ rosa na njoj. Kad o polnu upre sunce najjače peć, nać će se počitak va hlade pod „velun bukvun.“ Pod gustemi granami ke rastu skoro do tal našle smo mesto za položit hranu i pijaču. Na pol senokoši storena je za slučaj neverina, šupa lovnica. Bukove grane složene va rošku i nahitane z travun i senon. Ma kako za dešpet, sunce na vedre, nikakovega neverina. I ala razvakjat i prigrabit se ča j’ pokošeno, skupit i pograbit se ča j’ osušeno. I breme za bremenon, muški na špage, ženske na plašćenice, seno bude zinest doma.

Neki judi su pul kući delali stogi. Naši su so seno namastili va skadanj. Zasprave namastili. Morali su bit najmanje dva. Jedan je z velemi drvenemi vilami na tri rogi hital seno, drugi ga je mastil i slagal. I tako se do gred i do vrat. Zadovojni da su storili delo, nikad nisu govorili ni od truda ni od muki.

Našega starega puta za na Sapca ni već morda ni poznat, Lazi su razrovane od seči, senokoše zarašćene, a na skadnje kramarija.

Darinka Martinčić