Ki ne dela, ti ne ji

Zmislin se kako se je lepo kantalo „reci meni moja mala biš ti meni škverski trliš prala“.

Šal je moj prijatelj na delo hodeć u Treti maj, aš je bival blizu i razmišljal „ča ću ja sada, u žepu iman još malo drobiža. Niš, namesto cigareti ću kupit udicu i morda si nalovin ča rib.

Tako je storil, kupil udicu i plastičan sičić. Namesto poć štrajkat je zapušil zadnji cigaret i hitil udicu. Prijel je prvu ribu, lepi komad je bila. Bil je još jeno vreme i prijel još jenu. Govori on sam sebi da danas je još štrajk, pa je još žive ribe spravil u sić z vodu i si mislil „za južinu je, gren doma“.

Doma je vas vesel rekal ženi „evo ti, sfrigaj nan jih, za danas će bit“. Ona odgovori „znaš da smo zadnje ulje porabili prvi ćedan, tr znaš kada si zadnju plaću dobil“. I još je dodala „mogla bin jih skuhat, ma su nan i vodu zaprli aš da nismo platili.

Njoj govori „pa speči jih brez“. – Ni struje već ni, taprvidan su je zaprli“.

„A suseda, morda bi ona mogla?“ – „Tr i nojin muž dela kadi i ti“. Sreća da su ribe bile još žive, zel je sić i ribe i zanesal da će jih vrnit nazad u more.

Rekal njin je – ja ću vas vrnit u more, ma ko bite mi ispunile ku želju. – Ja, ćemo reć zlatni ribici, ona će bit zadovoljna i je dobra ribica. – Nu, rečte njoj da stori da dobijemo plaću, da Treti maj počne delat i još jeno – da delovci ne hodiju ća delat. Ja još samo tebi verjen.

Su utplivale, a on je za njimi gledal lačan i žalostan i si mislil „samo ko ni one ne pozabiju na me, na Treti maj i na druge delovce“.

3. maj, 1960.g.

Malo po malo je čital poli jedinih ki kupivaju novinu da zgleda da se je počelo movljat, pa drugi ćedan još jedan put da gre na bolje.

Treti put mu je sused donesal lepu novicu da rabi prit na delo.  

Premislil je i rekal sam sebi „gren aš ki ne dela ti ne ji, ma od sada ću već puti prit h ribican, sić mi neće rabit i ću se malo pogovorit žnjimi, njin verjen više nego drugin“.

Jože Sanković, Brce

Odgovori

Vaša adresa e-pošte neće biti objavljena. Obavezna polja su označena sa *