Korona se liči u Brusan

Josip Orlando Hrvatin poslal je za Škabelin jenu malu fotoreportažu z prirodne ljepote njegovega kraja, polja z potokon.

„Cvrčak“, list pionira osnovne škole Matulji 1960. leta. Prvo šezdeset let prvu pjesmu „Potok“ u polje Brusan med Šapljanami i Pasjakon napisal je Josip Surina, Srdetov z Pasjaka, učenik VI.a razreda. Iz arhive autora priloga.

Nis verval, priznan. Moral san pomancat oči. U nedilju zapodne tretega maja korona leta 2020, potlje već od pedeset let toliko ljudi vidit u Brusan ma brez matik, brez urudja, brez vozi, grabalj i kos. Samo hodiju kot da jih je strah ustavit se ali pomahtat. Su i Prvi Kastavac i prva dama Šapljanka z prvu malicu, spregovorili smo par besed pa znamo ki smo. Kumpriv je bilo, takove su samo u Brusan, ja pa boh, a malica mi se je lipo nasmijala z auta da san veselo šal doma. Morda ću doživit i da ki pride zapjevat kakovu domaću, dokle se je delalo i zapjevalo, ko ne u Brusan, po potu doma.

Bili su do Fontane si koliki, znači da vode poli Rulje šapljanske ni, drugače ne biju mogli pasat priko patoka. U Fontanu da je ni pa je suša dobro prišla vridnin Brijcon da si drva spelju za uvu zimu, da će bit i za prodat.

Brijci prvi z delon tiraju zlo ća ud sebe. Sila kola lomi! A uvo malo dažja ča je palo pred par dni ni ni za po dnu patoka ustat ni za storit skominu za se potočit uvanj. Paščanu Josotu Lukinovemu će i malo prit dobro za aroniju ku je posadil. Niki je bil rekal da neka dela ki je lačan. Njemu i gospodaru Žgombinemu ki uzgaja maline, po našu malanke,a i Nataši Šapljanki, to ne rabi govorit, za njih će bit, morda ćemo doživit da nas Brusan opet hrani, a i blago nafutra, ko ga bu.  Naprid vridni ljudi! A za une druge će vredit nova korona šetnica u Brusan. Morda se ki domisli dat most popravit, ma, ča ja znan, će bit kako i zas školu (molin još jedanput prečitat „Krič z Brusna“).

Črno bela slika Fontane od 27.8.1976. je iz arhive Hrvatske vode, VGO Rijeka, a kolor je slikal autor.

J.O.Hrvatin

Odgovori

Vaša adresa e-pošte neće biti objavljena. Obavezna polja su označena sa *