Saki osal zna svoj posal

Crekve je svojni pripadalo pol sela.
Pol šumi, pol umejak, pol blaga. Sega pol. Samo delo ni šlo na pol.
Težak je moral svojo odelat od početka do kraja. Niš napol. Ako j’ kopal, skopat, ako j’ žel, požet. A onputa poć takovo delo storit i plovanu. Najveć puti za niš. Ki put morda samo za pijat hrani i to ako j’ gospodin plovan bil od voji. A ovisti, ne samo da j’ bil škrtast, leh je bil i zločest. Samo Bog zna zaš ga je tu već let i let držal.

Kostim svećenik s križem

Zvali su ga don Jure, magar mu to ni bilo pravo ime i nisu ga voleli kot ča ni on ni volel nikega. Poznal je su zemju i šumu, znal je za saki tulac na frmente, saki grozdić na ružah i saki struk fažola. Težakinja ni mogla va žep stavit ni mošnjicu, ni pešćicu šegali. Se j’ videl i se znal. Težaki bi od jutra nadgledal. I ordineval. Ne daj Bog da počinu. Zato ga nisu ni voleli ni štimali.
Kad je na red prišlo za crkveno obdelat, molili su da pada daž, da grašica tuče…
Ma pomoći od neba ni bilo.
Bog ni nikad uslišal pa j’ zalud bilo molit.
Jenega leta potrefilo se da va dve šetemani rabi i konpir skopat, i grozje potrgat, i frmentu pobrat… I sebe i plovanu.
To jutro va plovanoven dolce se našlo čuda težaki i težakinj. Saki j’ znal svojo delo, ma don Jure je sejeno obahajal, ordineval i nos zabadal va saki posal.
Mej težaki je bil i neki Dušić.
Čovečina velik kot gora, dobar kot kruh, ma sled krivo nasajen. Volel je delat. Jedino ni volel da mu se komandira. Don Jure je to znal, ma otel je pokazat ki j’ ovdeka gospodar. Smiron je za njin štavral i iskal dlaku va jajen.

Gardener Man Images, Stock Photos & Vectors | Shutterstock


“Dušić, ovde si pustil dve čofujiki! Poberi ih! Dušić, Dušić, videj kako za tobun ostaju grudi, sigurno j’ i ki konpir nutreh?! Dušiću, zdigni matiku i bubni! Ovdeka, moj Dušiću, neće drugo leto fažol zilest, ako budeš tako mastil!”
I se tako. Dušić je mučal dokle j’ mogal. Gutal je i kjel va sebe. Ma tega dana, kad je polne zazvonilo, a on zdignul ruku da se zlamena, don Jure pošne zijat: “Dušiću, ne gubi vreme na molitav! Tvoja j’ matika, moj Očenaš!”
Dušić se napol obrne h njemu i reče: “Gospodine, i jas tako mislin! Saki osal – zna svoj posal!”

Cvjetana Miletić

tulac- klip; ruža – trs; fažol – grah; mošnjice – mahune; pešćica – mala pest; šegala – raž; ordinevat – naređivati;
grašica – tuča; štavrat – hodati vukući noge; čofujika – čehulja, dio grozda; mastit – gaziti; osal – magarac