Lipa pamti

Ova štorija Josipa Orlanda Hrvatina ni od danaska, ma j’ vavek ista.

MUNE, 30. aprilja 2006. – 11 ur je, rosi, puše, ma zdurat se more. Prišli su i Talijani, partizani i antifašisti z mesta Cordenons, Pordenone. Prišli smo se poklonit spominu na njihovega i našega combatente Zol-a. Svira talijanska, pa naša himna. 

Poginil je tote, u Mune. 

Isti dan popodne antifašisti, borci i ljudi zas sih kraji poklonili su se Lipljanon.

Gren pred crikvu lipajsku pozdravit Paščane, Šapljance i Rupljane  ki ćeju pjevat zas župnin zboron. Pred ko leto smo skup zapjevali „Nadgrobnicu“ Čajkovskega“ – „Dušom punom tuge, praštamo se s vama mi….“

Slika iz Spomenice KUD Danica Pasjak, komemoracija 30.4.1995; tekst iz Spomenice muzeja br.1, objava u Zborniku Liburnijskoga krasa, 2011.

Nutra u crikvu klavijature sviraju  Schubertovu „Klanjamo se smjerno“. Ćutin mir, gren pomalo pred spomen-mesto, čitan, trnen, u srce mi je tisiga, velika žalost. Tamo su ubiti, zbodeni, zmitraljirani, zapaljeni ljudi, dica ud 1,2,3, 7 let, matere, oci.

Prijela me je jeza, razburen san se spustil pred ljude – stojin mirno, svira se „Lipa naša“. Doklje su kanturi pjevali „milost“ navrh smrikve doletil je kosić i tako ustal do kraja. Oćutilo je božje blašce poseban hip, mir, žalostan mir.

Potlje besed načelnika Frlana ljudi su fanj mučali, si su čuli da je govoril zas srca kada je rekal „Tega 30.aprilja 1944. u Lipu je ubito čovištvo.“ Malo kašnje je recitiral  glumac Galiano Pahor.  

Kastav 1.maja, čestitan Kastavcu praznik. On mi govori da se kot danas zmisli partizani ki su tega dneva 1945. prijeli i po mestu popeljivali fašistu talijanskega. Kričali su „on je palio Lipu“. On je kričal „Viva Duce“ saki put kada je dobil vritnjak.  

Na pol puta Belići-Obadi nutra u stražarnicu piše „Alle porte della patria non si dorme“.

Ča slobodarska Kastavšćina je njigova domovina? Ala prokljet je nauk, škola i politika ka čovika vadi da je njigovo uno naše!

U Lipu potlje komemoracije san pital jenu ženskicu Slovenku z Bistrca ča misli. Uvo mi je rekla: „Nismo mi njih streljali ni palili, naj si grejo …ženit tam otkod so pršli, naj si kosti in črne križe nesejo preko meje tam otkod so.“

I meni je Lipa preblizu da bimo drugače mislili. Lipa – klanjan ti se smjerno.

J.O. Hrvatin