Cvjetni korzo Matulji 1957./2020.

Maškarana kumpanija „Cvjetni korzo“ udruge matuljskih penzići šla se je pokazat na Zvončarsku smotru dana 22.februara 2020. od ure zapodne. Prvi su bila dičica Dječjega vrtića, a druga penzići.

Misal je potekla od predsjednice Sonje Vlah i „ćemo-dajmo“ zajno prihvaćena. Same su krojile i zašile, klobuke i rožice. Prišle su i članice z okolnih sel općine. Općina je pomogla kupit del robe, a drugo su dodale same. Muški su se ubukli u vrtlare, jedan je bil božja ovčica ka ubletiva okoli rožic, a jedan je nosil koš pun rožic ud krep harte. Velimir Baćić je dal i vozil punu karijolu friških rožic pa su jih razdelili publiki.

Jimili su i muziku kako se prista pusni kumpaniji. Tako su šezdesetak let kašnje opet hodili kot „Cvjetni korzo“. Sprida su dva nosili lipo pofrban transparent z rožami, kega je naslikala Nadija Škerjanc, a udzat njega su zakolali črno-bele slike njih kot dičice. Bilo ih je priko četrdeset. 

Misal za to prišla njin je naprit aš su kot dica puna veselja rada bili „Cvjetni korzo“ kot školani osnovne škole Matulji, a danas penzići. Bilo je to ud 1957. do 1963. leta.

Kot  dica su na glavu nosili rožice sih sort, dremafki, ali zgončići kako reče ki kraj (visibabe) itd. a bili su, kako ki, divojčice ubučene u bele kitljice (brhančići), nosili u to vrime popularan hulahup, velike balone, košarice z rožicami, z kreli matulji (leptira), a nike ubučene u kitljice z folkolornimi motivi z narodnih nošanj i facoli raznih dišenji (uzorci).

Bilo je i zečići z dugimi ušesi, sportaši z balami i tenis reketi. Unih let su šli  z matuljskega Štacjona, a danas „od Ferandi“ pred sam spust proti centru Matulj. 

Kada je smotra finila dobro raspoloženi penzići po naše „ne gremo doma aš još je rano“ produžili su u Opatiju u „Centar Gervais“ i dobili prvu nagradu. Krepat ma ne molat! Se za stare navadbi.

Poglejte črno-belu sliku „pul Ferandi“ na ku su dica s tamburicami i notami. Ta leta su Matulji u školu jimili i tamburaški sastav. Učil ih je nepozabljeni učitelj Leo Ivančić. 

Črno bele slike su nan posudili Gordana Grgurina, Vlasta Bralić, Franjo Slavić, Slavljana Baćić, Nadija Škerjanc i Lilijana Midžić.

Ova slika ima prazan alt atribut ; naziv datoteke je rFxeX3jz_UAb0LzivwgT2RTIXlEwDo4rMEqa6gjYtH34pJNIIhBMepaT6fdWpdIGqYugYqwW9WHx_8D_eTdHUyl8Q7kF5gXXAMa_O7S4_LQOnBB-ipcOYL8jP0CEVHYbXdjmXmNTJW9NigVC-Q

Uvo leto su dica z Vrtića Matulji z „tetami“ bila „dalmatineri“ i bilo ih je okoli sto.

Sve slike nan dobro pokažu svečani trenutak ovakovih ophodi, a to je sritit se z publiku, a tamo su njin bili nonoti, brati i sestrice, susedi i prijateli. Centar Matulj je danas bil krcat ljudi z raznih kraji Hrvatske, Slovenije i još utkuda. 

Izvještava samozvani pusni izvjestitelj J.O.Hrvatin