Zvončarska simfonija va Čavje

Nedeju, 9. sečnja, va Čavje će se z „Zvončarskun simfonijun“ otpret Festival 27 susešćin, ki se održava skupa z Rekun 2020 – evropskun prestolnicun kulturi. Z programon 27 susešćin Reka se povežuje z 27 lokalneh zajednic va Evropskoj unije.
Susešćina Čavja će z pomoćun Grobničkeh dondolaši pripejat grupi z tujeh zemji da se malo videje i čuje kako se kade zvoni – to će bit simfonija ka će se zasost na samen kraje manifestacije.
Zato organizatori pozivaju si zvončari neka pridu na Čavju, i zvone skupa z zvončari s cele Europe. I neka provaju najjače zvonit!

Va “Zvončarsku simfoniju” će nas uvest bubnji, a velu povorku zvončari ka će finit “Zvončarskun simfonijun”, na Čavje će 9. sečnja naprvo pejat “Karlovački bubnjari”.

Udruga Karlovačkeh bubnjari “Carolosboom”, ka je po svojmi nastupi poznata po celoj Hrvaskoj, će važgat atmosferu za okole petsto zvončari z Hrvaske, Njemačke, Mađarske, Bugarske i Makedonije, koliko će jih nedeju prit na Grobnik.

Fotografija Ri Prsten.
Karlovački bubnjari

Z Bavarske na Čavju prihaja grupa “Klausen”. “Klausentreiben” je hijadu let stara užanca, z kun su va Bavarskoj tirali vragi, a recept je bil – zgjedat grje od njih. Njihe maske i kostimi, ki skupa pežu i do 25 kil, z pelicun prekrivaju telo, a imaju i rogi i velo zvono za pas opasano. Magar je to muško “delo”, z njimi paradiraju u ženske, i to kod “Bärbele” (vještice).

Fotografija Ri Prsten.
Klausen

Z mađarskega Mohača na Čavju prihajaju “Buše” (Busójárás) ke sobun nose kraj zimi. Si su va krzno obučeni, a lice njin ni poznat od drveneh maski kakove va našeh krajeh nismo užali videt.

Fotografija Ri Prsten.
Buše

Z bugarskega Pernika na Čavju prihajaju “Survakari”, stare bugarske maškari. Imeju strašne maski, z veli rogi i zubi, a okol pasa veli zvonci. Tako spravni, “Survakari” po kućah i seleh Perniske regije tiraju zli duhi, boli i zimu.

Fotografija Ri Prsten.
Survakari

Z črnemi bragešami i vunenemi kalcetami, z licen od saj, z velemi muštaći i bradun, prihajaju mađarski “Djalamari” i z kuć tiraju zli duhi. Okol pasa nose deset vrst zvonac, a v rukah drveni šćap.

Prit će i zvončari z Črnega Luga, z Gorskega kotara, keh zovu Pesniki. Zvone već 300 let. Si muški ki nisu oženjeni, dan pred Pepelnicu zamu šarene maski i drveni šćapi pa zvoneć zovu mlado leto. Delaju i “šicanje”, kad jenega mej sobon zamu, zdignu i hite va zrak, pa ga moraju nazada ćapat…

Zvončari z Črnega Luga

Didi z Kamešnice, brda pul Sinja, prit će z “ovčjemi mišinami” do metar i pol na glave, a okol pasa zvon. Opravjeni va staru robu zluštranu z šarenemi cindrići, nan povedaju kako se dobri duhi bore proti zimi, a tiraju ju skačuć i zijajuć.

Didi

Z Varaždina, z mesta Sračinec, prihajaju Črne Srake. Maske su njih črjeno-črne, kodabi neko blago, a ručno su storene od prirodneh materijali, ovčje koži, rogi i zubi. Saki zvončar v rukah nosi trs od ruži, a šest zvonac okol pasa bi bilo šest meseci, ale pol leta.

Fotografija Ri Prsten.
Črne Srake

Na Zvončarsku simfoniju prihajaju i Zametski zvončari, ki zvone od 1971. leta. Nose mornarske majice z kratkemi rukavi i bele brageši, a na glave ovčju kožu i veli rogi pa su malo kot Vikingi…

Fotografija Ri Prsten.
Zamećani

Va rukah drže “mačuki”, a okol pasa velo i glasno zvono. Jih je čut nadaleko, će se orit na Grobnike…

Z Grižan prihajaju “Griški krabunosi” ki obahajaju Grižane va onen ča najdu va konobe. Monduri nimaju, a recept za dobru masku njin je jednostavan – “ča grđi to lipši”. Sost će na bubnjeh i na činelah.

Fotografija Ri Prsten.
Krabunosi

Na Grobnik prihajaju i Ćićski zgončari, z laniške općine. Imaju dva vela zvona, teška osan kil, a ž njimi tiraju zimu i čuvaju stare užanci.

Z Kukuljanova te prit Kukuljanski zvončari, z črnemi glavami, v rukah “mačuka”, a na glave kožni “tuljak” z kega pada šest žuteh i šest črjeneh cindrići. Njihovi zvonci na kraj zimi od zla čiste Bakarski kraj.

Fotografija Ri Prsten.
Kukuljanski zvončari