Ne pijaža mu se Vitorić

Živeli su pul Rubeš na starine. 

Dozidali dve kamari za decu, ka su nabrzo prihajala i kot z vodi rasla. 

I kad su zrasla da njin budu napomoć, dve najstareje hćeri su se oženile. 

Doma j’ ostalo još pet manjeh za odgojit. 

Otac ni bil vremenit, ma smiron nekako bojihav, pa j’ malo delal, malo ni. 

Najveć je moral počivat. Po lete j’ ležal na ždraje pod murvun, a po zime va pusteje. 

Premrznul je va onen Drugen rate pa bi mu sako toliko nabohtela kolena. 

Ov put mučil ga je još i grd kašaj. A febra se zdigala i padala kot da se igra. Nikakova domaća lekarija više ni pomogla. Ni bilo druge, leh zvat duhtora. A duhtora se svojni zvalo kad je bil krajni konac.

Pride gospodin Kajetan Blečić, kastafski duhtor, va kućnu vizitu. 

Kajetan Blečić

Ivanka ga brzo otpeja va kamaru. Vitorić leži zaripjen, teško diše, hrope i skuca, poti se neš od boli neš od febri, ne more na nogi, ni sest, a saki put kad zakašje, stori i sledić poda se.

Duhtor ga gleda, kima z glavun, meri mu tlak, posliša srce…

Onda mu opet gleda va oče, va grlo, tuče z batićen po koleneh, šlata po vrate… I opet posliša srce… Jeno tri puti ga j’ sega tako dobro pregledal, a onda zel hartu v ruki da napiše ricetu. I se onako pišuć, da ga Vitorić ne čuje, šapiće žene: “Gospa Ivanka, mane se vaš muž baš niš ne pijaža…”

“Ne ni mane, gospodine, ma ča ću storit kad san š njin već trejset let?!”

Vitoriću ni bilo sujeno umret. 

Posensega ni nikad ozdravel, ma j’ poživel još jeno desetak let.  

Cvjetana Miletić