“Božić je judi” va Zagrebe

Domaće sopile i domaći zajik zvonili su večeraska va zagrebačkoj katedrale, kade j’ po prvi put otkad postoji, održan koncert “Božić je judi”. Nastupili su ženska klapa Luka, Žejanski k’ntaduri, sopci Ivan Kosić i Zlatko Volarić z Krka, Vrbenske kanturice, grupa Koktelsi i naši poznati kanturi z MIK-a: Mario Battifiaca, Martina Majerle, Katja Budimčić Sabljar, Nikolina Tomljanović, Duško Jeličić-Dule, Vivien Galletta i Voljen Grbac, i Tina Vukov.

Si ki su nastupili va Zagrebe

Najlepšu božićnu čestitku Zagrepčanon prnesli su z Kvarnera, na koncerte ki dura još od 1994. leta i sako leto okol Božića razveseli judi ki vole božićni kanat. Kantaju se, a tako su se i večeraska, naši primorski i istarski božićni kanti, ma i onisti z celega sveta.

Kruna koncerta j’ skladba “Božić je judi” ku j’ napisal Dražen Turina Šajeta i čestitane Božića sen juden.

Vrbenske kanturice

Zagrepčanon se pijažalo se, ma su jako šesne bile Vrbenske kanturice z kanton Bog se rodi, Katja Budimčić Sabljar ka j’ kantala “Djetešce nan se rodilo” i Voljen Grbac i Vivien Galletta z kanton “Oh, holy night”. Žejanski k’ntaduri i ženska klapa Luka su jako lepo otkantali “Tihu noć”, a, magar je koncert bil va crekve, atmosferu su malo podignuli Koktelsi svojen noven kanton “Sretan Božić i novo leto”.

Žejanski k’ntaduri

Odgovori

Vaša adresa e-pošte neće biti objavljena. Obavezna polja su označena sa *