Vilija božja (2. del)

Na Viliju božju ni druge rušnji kako drugeh dnevi, aš do polna zvan sledić črnega kafa ne sme nijedan niš jist, ako ne mića deca. Ni za obed ni baš obilo jist, aš do sita se sme na Viliju božju samo jedanput jist, pak se to špara za večer.

Pul Marčeji jedu za obed broskvi z ulen i palentu prez konpira, a drugda se vavek za obed kuha palenta „konpirica“. Za obed kuhaju zele od broskav ale pak od kaupuzneh vešic. To jedu s palentun, a ne s kruhon. Užanca je slane ribi i friški oslići. Ako ni oslić, ale ako su predragi, more bit i neke druge ribi, samo da su friški ribi. Užanca se mora odbavit. Va nekeh seleh užanca je na Viliju božju za obed od frmentirane muki kaša z črnen vinon. To se zove „kaša z vinon“.

Za polnen, kad pride južinska doba, družine se krivo vidi, aš ni po navadbe za južinu belo kafe, kako drugi dnevi, lego kapić črnega. Z belen kafon se poji kus belega kruha. Ma bomića na Viliju božju moraju on sledić črnega kafa popit pres kruha. Ka tr ka mat da dece malo belega kafa, ale tu njih ne da va kuhinje, lego va kamare, da ki ne vidi. Da to vidi ka suseda, zajeno bi po sele raznesla, pak bi ontrat so selo gučelo: „Mora nas trt šuša, grašica, krepača  va blage i se nevoji, kad judini na ovakov dan greše, zahićuju starinu“.

Image result for crna kava

Za južinun ženske zametu ulenjaki i stave jih va kakov lonac gotovit, a ontrat pak počnu kuhat večeru, aš na  Viliju božju j’ užanca raneje večerat lego drugi dnevi. Nekada j’ za južinskun dobun  bilo čut hitane na se strane. Judi su imeli ontrat praha i kordi, aš su po krčevinah minali. Frkolari su za Viliju božju doma ocu zeli prah, pak su hitali. Prah nabiju va kakovu železnu kanu. Hitaju još i danas, lego ne kako nekada.

To se zna, da se stareji judi na to hitane kuričaju, aš se već puti pripeti kakova dezgracija. Kana se rastriska, pak kemju frkolaru prsti rascenpera.

Deju, da j’ najboja kisela repa, ka se na Viliju božju stavi kisat, pak su uževali, utinut boji hmeti, na Viliju božju jutro oprat repu i stavit kisat. To j’ već zadnji dan za repu kisat.

Gospodari navrtaju bačvi i pokuse ono bojo vino, ko se ne točeva, lego ko stoji za prodaju, za pir, za botrinje i već za takove dnevi, kako j’ Vilija božja i drugi već godi.

Sused suseda obrije i ostriže. Kravi lepo ostrigaju, gnoj skidaju i dvor nastaju lepše lego drugi dnevi. Neki kupe za Božić govedinu, a neki ubiu kokošu ale peteha. Ako će ki ubit kokošu ale peteha, zame sekiru, gre na cepćilo, pak na coke blagu glavu oceče. Trupa dece ovrani tnalo, aš gjedaju kako još jedan časić to brižno blago hopca po tnale prez glavi. Ženska pol sela obajde, dokle najde, ki će ubit kokošu.

Tako do polna se j’ to finjeno. Šuš je parićan za ribi frigat, cok je već parićan, tnalo pometeno, drv puna sušila. Popel z popelnice znamu, pak š njin vrt pospu. Kuda se pospe na Viliju božju popel, ki j’ va advente storen, ne će v lete živjad.

Kad se sunce počne gori lovit, otac reče: „Deca, sunce re na spavalo. Trebe j’ kuću okrunit!“ Ontrat deca okrune z javorikun i z bršjanon sa vanjska vrata na kuće, skadnje, na dvore, na koce, a bomića i na kokošnjake. Kad je se okrunjeno, ontrat nesu velik cok pul oganj.  Ta cok mora bit pul ognja do Trih kraji.

Image result for lovor

Za zdravun marijun prestanu hitat, aš gre saki na svoj dom čekat večeru. Pul večeri j’ nekako tiho i deca su mirneja lego drugi dnevi. Stol je pokriven z belen obruson od domaćega platna. Na sred stola gori vošćena sveća. Na stol pul sveću stave jedan brus, na saki kantun stola jenu glavicu česna, a pod obrus par soldi. Brus, ko j’ na Viliju božju na stole, deju da j’ dobar za kosu brusit. Česan je pak dobar za lekariju. Kad se česan z nohton rani, počne gnjilet. Zato deju, da on reče: „Čuvaj ti mane od nohti, ja ću tebe od devet boli“. Va jenoj koneštrice na kraje stola je hjeb božićnega kruha. Ta hjeb nijedan ne načme večer, lego se čuva za Božić. Temu kruhu deca kantaju:

„Hvala Bogu i Božiću
Dokle j' kruha va košiću."

Na stole j’ bukaleta ale vrč najbojega črnega vina. Va vino se stavi jeno pečeno jabuko i kušćić opečenega belega kruha, To se zove „supa“, aš se kruh napije al nasupa vina.

Kad je tako se parićano, gospodarica se prekriži i za njun sa družina. Najprvo zmole jedan očenaš i zdravu mariju za pokojneh, a potle očenaš i zdravu mariju za onega od kuće, ki j’ kade po svete. Nekada j’ saka kuća va Kastafšćine imela nekega va Merikah, al kade po more, al po šumah na dele.

Kad se va molitvah zmisle na onega, ki j’ po svete, sen navru suzi n’ oče i jedan časić je se tiho. Kad za molitvun si malo nase pridu, počnu večerat.

Najprvo prnesu za stol zeje od črneh broskav, slane i friške ribi i palentu. Nikada se za večeru ne kuha palenta, lego samo za Viliju božju. Za zelen prnesu fažol na salatu pak bakalar.  Va koneštrice j’ narezano kruha z cizibun i prez cizibi.

Kad povečeraju, zname gospodar z vrča s pirunon supu i jabuko. Supu razdele sakemu, ki j’ već velik, jedna kušćić, a jabuko razdele dece. Supu ne poji jedan sam, aš supa j’ puna vina, pak bi ga opila, ki bi ju sam pojil.

Povedaju da j’ šla jušto za Viliju božju neka Kranjica na Trsat majku božju obać. Prvo leg je šla va crekav, da j’ šla v oštariju i da j’ zvala žmuj rakije. Va rakiju da j’ umakala kruh, pak je kruh pojala i rakiju ž njin. On put da j’ rekla: „En kozarc je spil kruh, enga bum pa jaz“. Kad je popila još jedan žmuj, da j’ šla onako za sen fundamenton  nasupana rakije va crekav. Svet njoj se j’ vrtel, pak su njoj si oltari okole šli. Ona da j’ rekla: „Mati božja, prišla san da te ophajan, pa ti mane ophajaš. Pa neč za tisto! Ti si Marija, jaz sem Marija. Ti si mati, jaz sem mati. Tvojega sina su na križ pribili, mojga su pak obesili, pa smo enake!“

Image result for supa istriana

Zato se saki boji sam supu pojist, pak reče: „Supu razdelimo, aš jenega bi opila kod Kranjicu na Trsate“. Ki rad pije, mu reču: „Pije kod supa“. Pečeno jabuko, ko j’ va vine, razrežu na landice i razdele dece.

Kad si povečeraju, gospodarica se zname stola,   samo pusti kruh i vino, a na stol stavi kostanja, smokav, ureh i jabuk. Gospodar z vinon poškropi cok zad ognjen. Gospodarica gre za večerun ulenjaki frigat. Ulenjaki su od gotovega samo zametenega testa, ko frigaju na vrelen ulen. Zato se zovu ulenjaki.

Sad saka kuća okruni „maj“, a nekada je samo ka tr ka. Maj zovu okrunjenu jelvicu. Nijedan va Kastafšćine ne reče „božićno drvce“, lego „maj“. Saka okrunjena kita zove se maj; trebe da zato, aš su va maje mesece kite pune rožic.

Za vreme večeri užanca je, da j’ sama družina i bilo j’ nekako se mirno. Za večerun pridu susedi, utinut tamo, kade j’ stočišće. Vino piju, kostanj peču i povedaju sakakove ganki i štolije, kantaju i koledvaju.

Kad se kostanj peče, store više puti špaš. Kostanju se mora, prvo lego ga se stavi peć, koža razrezat, aš ako ne, on pukne. Mladići kada god zagrnu va prhavicu na ognjišće nenarezan kostanj. Kad se kostanj stepli, pukne mu koža, pak skoči po seh, ki su okol ognja, prhavica i popel. Nijedan ne zna, da j’ kostanj cel, lego on, ki ga j’ stavil peć. Ale on se j’ prvo osnažil z ognjišća. Kad kostanj hiti, si se smeju, a kemu god baš ni do smeha aš ga prhavica opari.   Kad se si dosta na kumedijaju, počnu koledvat.

Ivo Jardas, Kastavština

Odgovori

Vaša adresa e-pošte neće biti objavljena. Obavezna polja su označena sa *