Štorija, ma ne od kunelići ljeh o dva čakavska glagola

Hljopnut

Čakavski glagol ljusnut / hljosnut / ljosnut / pljusnut / hljusnut / bljufnut / bljusnut znači past, tresnut na pod sun težinun tela. Bliskoznačnica hljopnut znači isto past, ma na način de se uz pad čuje i mukli, prigušen, tup zvuk, ki se na niki način više doživi z šestin čulun, ljeh ča se čuje. 

Zlobinjarka Tereza rojena Jadro, po prvin mužu Ružić, a po drugin Kružić, živela j sama na Zlobinu kbr. 63, a susedun je znala gusto divanit:

–  Po noći čujin zmiju kad hljopne z poneštre. Za miloga Boga! Nemojte ju ubit, aš mi kuću čuva. Da je nij, miši bi me pojili!


Pokojna Tereza  rojena je 1885., a umrla 1968. leta. Mat njoj je bila Ursa (nadimak Ursača, pa j’ Tereza med drugimi Terezami bila prepoznata po matronimiku Tereza Ursačina).  Zela j’ za muža 1904. leta Ivana Ružića Puha / Pušića ki j’ umrl tri leta potla ženidbe va meričkomu gradu Spokane, savezna američka država Washington. Dovica Tereza Ružić oženila se j’ 1919. po drugi put. Ov put za dovca, isto Merikana,  Antona Kružića Tonaca Vučića (1881. – 1959.). Imeli su sina Brankotu (rojen 1921.) ki j’ poginul va partizani nigdi va Liki ali na Kordunu 1944. leta. Na kraju svoga življenja ustala j’ sama va kući broj 63, a jedino društvo njoj je bila zmija kuj je slušala po noći kad bi šarulja hljopnula z poneštre va zadnjoj salici.

Kljuncat

Kljuncat je, pak, glagol ki se more objasnit jedino opisno. Kad se ča tekućega va sudi bućka pa udriva po bandi, zo tin se stvara zvuk. Buć. Celi ta jisti proces: bućkanje tekućine va posudi i zvuk ki pri tome nastaje, e, to bi bilo kljuncanje

Kadi se to se tekućina more kljuncat? Va zdelami, padelami, lunci, sudi, pinjatah, čripi, čanjki, sići, barilci, brintah, lodricah, bačvah, kogomah / kokomah, kikarah / ćikarah, žarah, vrčinah, kabli / kablačah, mašteli, okruti, palji, žmulji, bocah, bocuni

Water, Water Glass, Wine Glass


More se voda kljuncat i va kili ku čovik nosi na sebi. Va nigdanje vrime nij se za takvu sitnicu hodilo va bolnicu, ljeh bi se samo z posebnimi remeni kila podvezala uz telo. Sporadi toga bi se znalo  govorit za kilavce da njin voda va kili kljunca!

Radovan Tadej, Čakavski besedarij