Zač se jedan park na Pećinah zove Vidov park (a ne Mirtin)

Zadnjeh let se više se kupan na pećinskemu Križiće aš mi je najnaredniji za stombakat se z Vojaka do dole. Ma je vrah za nazada, do domi prit aš je teško hodit nazgoru po oneh vaja milijun skal. A još kad sunce pripeče!
Prvo san šal z buson ma otkad retko vozi onaj busić 1B i to je problem aš moraš najprvo poć z jedinicu do Fjumere pa onput z dvicu do Vojaka ča zame vremena više leh poć vrah zna kamo. Zarad tega san zmislel novu rotu. Gren hodeć od Križića do Piramide, ča dura oko petnajst minuti, pa onput hop! na bus do Tete Rože al do spod nebodera kade bivan va Šćitarovoj.


I tako gren ja jedan dan, bit će već i cel mesec, kad mi malo pokla škole Pećine oko zapne za ploču od kamika na koj piše “Vidov park”. Ma kakov pak sad vražji Vidov park? Ne gren baš na gusto po ove ulice (Šetalište XIII. divizije) ma sejno san fanj puti tuda pasal,a nisan videl ov natpis. No, taj dan nisan imel vremena pa san si obećal da ću drugi put poć videt ča je to i koliko se to more nazvat park aš mi je zgledalo nekako stišnjeno.
I zajno drugi dan gren ja to pogjedat,a sobun san zel i fotić kega od dragosti zoven Črna pantera. Malićo san poslikal park ki mi se jako zapijažal.
Na internete san malo poiskal ča piše o ten parku pa ću van uvde neč od tega prenest.

Fotografija Miljenka Mrvčića.


Dešenj za Vidov park da je, kako piše, trejseteh let XX. stoleća storil Zlatko Prikril. Park su najprvo nazvali Park kraljice Marije. Tista Marija je, dok je bila krajica , morala bit fanj jaka ženska aš se po njoj zval i veli, najlepji putnički brod Jugpslavenskega Lloyda. Ma kad su joj muža ubili va Marseje već ni bila krajica leh krajica majka pak se ni brodi već nisu po njoj nazivali a i park je kasneje (moren mislet kad) dobil novo ime – Perivoj grofice Zrinske ko se je zajdin 1946. promenilo va Vidov park. Evo ti ga na – park je vavek jedan ma imena se menjaju.

Fotografija Miljenka Mrvčića.


A zač se park na Pećinah zove Vidov park i danaska?
Vid je bil nadimak Vladimiru Švalbe ki je bil pred II. svecki rat profesor (nisan našal ča je predaval) va sušačke gimnazije a kad je rat počel znal je kamo trebe poć. Z obadva sina šal je partizanon. Pul Jurdani da je 1944. leta finil njigov ratni put.

Fotografija Miljenka Mrvčića.


No, sadahna da van napišen neč i od samega parka ki da pokriva 2.900 metri kvadrateh. Storen je na tri podi a na vrhe je vila pokojnega viteza još od austrougarskega doba Vjekoslava Kozulića. Atres te vile ka je sadahna stanbena zgrada z osan stani velikosti od četrdeset do preko sto kvadrati je Šetalište XIII. divizije 21. Z jene strani parka je isto jena od Kozulićeveh kuć ka je danaska hostel a i z druge, zapadne strani parka ni dugo još jena Kozulićeva vila – ljetnikovac. Taisti Kozulić je nekad imel više vil leh ja danaska lasi.

Fotografija Miljenka Mrvčića.


Va parke su posajena dreva i štrpedi na ka smo navajni va našeh parki , a stazice su drite i nisu šundrane z dažji kot ča su na primer va Trsatsken parke. Na vrhe, pul hostela je dečje igralište a i dosti klupic je po celemu parku. Mane se pak najveć dopala špina i škaf va ku voda oteče.

Fotografija Miljenka Mrvčića.


Park je lep, ima vodi a još da je malo obrezat kite ke su do tla bil bi još lepji. Nego i ime mi se čini malo passe (prez mačke). Mislin da bi bilo vreme promenit ime temu parku. Niman pojma kako ga nazvat, morda po kakoven primorsken drevu al rožice ke bi rabilo posadit po parke. Recimo reć – mirtu. Mirtin park!

Miljenko Mrvčić