9. susret Dica i ČAkavica

Va Jelsi na Hvare pasanu šetemanu finile su 28. Čakavske večeri “More naše plavo ČA nan život daješ”, a finjetak su polepšala deca, njih okole 200, ča su kantala, govorila, glumila… Dalmatinska čakavica durala je dva meseca, ma dura i malo više od tega, govori nan prof. Jadranka Šošić, ka je pred 28 let pokrenula danas velu manifestaciju čakavskega zajika va koj sudjeluju i deca z Novega Vinodolskega, z Pazina, z Reki.

“Nan je cilj očuvat čakavicu, a zato imamo mobilan festival ki gre sako leto na drugo mesto”, nan je povedela prof. Šošić. Kad su počeli ovaj projekt, je bilo manje dece i manje interesa, a sad je to čuda naraslo, pak njin sliki na natječaj šaju i deca z inozemstva, z Makedonije. Va ten njin pomaže i Agencija za odgoj i obrazovanje (AZOO). Va likovnen dele saki more poslat svoje sliki, a recitacije i drugi literarni radi šaju deca ka umeju po čakavski govorit. Si se oni moru prijavit na natječaj “ČA u versin, riči i pinelu” ča ga va deseten mesece objavi Agencija za odgoj i obrazovanje.

Ovo leto su deca z rečkeh škol jako dobro pasala, aš su drugo i treće mesto va razrednoj nastave ćapale dve divojčice od Srdoč:

2. Mara Slipšević, 2. razred, OŠ Srdoči, Rijeka (Nensi Čargonja Košuta, mentor)
3. Lara Košuta, 2. razred, OŠ Srdoči, Rijeka (Nensi Čargonja Košuta, mentor)
Marino Babić, 1. razred, OŠ Srdoči, Rijeka (Gordana Vukić, mentor) prijel je posebnu nagradu Povjerenstva, ča je Srdočen i dobremi mentori jeno velo priznanje.

Malo veća deca, va predmetnoj nastave, su bila isto jako dobra. Prvo je mesto podelil Bartol Jermaniš, 8. razred, OŠ Vladimir Gortan, Rijeka (Ljiljana Jurman, mentor), a treće mesto je podelila Elena Mahne, 6. razred, OŠ Čavle, Čavle (Dolores Maršanić, mentor)

Posebnu nagradu Ravnateljice prijela je Lucija Štancl, 6. razred, OŠ Vladimir Gortan, Rijeka (Ljiljana Jurman, mentor), a mej pohvaljenemi literarni radi su i oni od Eni Žeželić, 6. razred, OŠ Čavle, Čavle (Dolores Maršanić, mentor) i od Ajle Silajdžija, 6. razred, OŠ Vežica, Rijeka (Ester Acinger, mentor) .

Va srednjoj škole, se su javorike pobrali mladi s Pazina:

1. Lea Bažon, 2. razred, Pazinski kolegij – klasična gimnazija Pazin s pravom javnosti, Pazin (Sanja Depikolozvane, mentor)

2. Antonella Šain, 2. razred, Pazinski kolegij – klasična gimnazija Pazin s pravom javnosti, Pazin (Sanja Depikolozvane, mentor)

3. Hrvoje Vojvodić, 4. razred, Pazinski kolegij – klasična gimnazija Pazin s pravom javnosti, Pazin (Sanja Depikolozvane, mentor)

*Posebna nagrada Ravnateljice:

Vanessa Buždon, 3. razred, Pazinski kolegij – klasična gimnazija Pazin s pravom javnosti, Pazin (Orijana Paus, mentor)