Kako su Grajani seli sol i sadili sardelice

Grajanon se navražju grustelo gospošćine plaćat daciju na sol, ka j’ prihajala s Preluka, to s kastafskega porta pred Volosken i na draginju kupovat sardelice. Dokončali su da te nasadit sardelic i naset soli. Tako su i storili.

Čekali su i čekali, ale nisu otele zilest sardelice ni sol.

Ja, deli su, ćemo još jedanput sadit glavi sardelican va zemju, a ne repi, kako smo prej. Neka repi vajer štrče. Da preveć ne zmasti, ki seje sol, dokočali su, da te ga četiri nosit na čiverah. Se su to tako storili. Ma sopeta njin ni niš zilezlo. Parali su, da muhi pojedu saku kjičicu, ka zileze. Župan i stareji su dali ordin, da gredu po črede saki dan dva ubijat muhi.

Najprvi su šli Zvaniša i Tončić. Imeli su saki svoj mušket. Vaje j’ zletela Tončiću jena muha na štumih. Da aviza Zvanišu, del je: “Pst, pst!” i pokazal mu muhu na štumihe. Zvaniša j’ umeril i shitil Tončiću va štumih, da ubije muhu. Tončić se j’ brižan vaje popičil, gore kopiti. Zvaniša j’ rekal: “Za jubav božjum, Tončić, ti si se prestrašil prvega tira.” Muha j’ pak, hudoba ju zela, zletela Zvaniše na nos.

Ivo Jardas, Kastavština