Mlekarice

Mlekarice su bile ženske ke su nosile va grad svojo ale tujo mleko. Mleko se je prvi dan pomuzlo, nalelo va vele padeli, skuhalo i stavilo odstat da stori škorup. Padeli su se stavjale na kakovu kamaricu na stol, ale pak na poneštru znutri da ne pridu muhi. Kad su se mlekarice jutro stale, još je bilo trdo škuro, ni petehi se nisu još oglasili. Najprvo su obrale, al’ posnele, škorup z mleka i stavjale ga va posebnu posudu. Kada se ga j’ dosti nabralo, stavilo se ga j’ na tihi oganj pomalo cvret. Od njega se j’ dobilo maslo i glodice.

Rukavačke mlekarice: Tereza Šepić-Čiškina, Marija Mandić-Opačijova, Milka Šepić-Šalova i Tonka Tancabel-Mihotova, 1918.leta

Jutro se j’ pomuzlo kravu, pak se j’ nekoliko friškega mleka pomešalo z onen od čera i nalelo va lati. Stareje lati za mleko bile su od lamarina, a noveje cinjane, a držale su od jene do pet litar mleka. .Mleko se j’ nalelo do pod vrata od lati, pak je va latah kjoncalo kad se j’ hodilo. Posložile su se va kofu, jena do druge. Va kofe j’ moglo stat pet do šest lat i još ka boca mleka mej njimi. To se j’ lepo pokrilo z jenen tavijolon. Prvo nego j’ ženska krenula, popila j’ kafa z kruhon. Kafe se j’ najviše kuhalo od ječmika, a nutar se je stavila još i cikorija “Frank”. Ki j’ bil malo premožneji, stavil je i malo pravega kafa. Pravo kafe se j’ retko kuhalo. Črno pravo kafe kot ča se pije danas ni nekad bilo va mode.

Mlekaric je vavek šlo više njih sela, pak su jena drugu zvale, al’ su se dogovorile kade se čekat. Obično su nosile vunene kalceti na nogah i opanki na prekju. Po lete su nosile kratke kalceti, a po zime do prek kolena. Zgora kolena stavile su laštik da njin hodeć ne padaju. Puti po keh su hodile bili su beli, prašni i najveć kroz šumu. Zvonejske mlekarice imele su dug put. Veli tekac njin je bil dokle su preko Zdemera i Lepotnjaka, pak skroze šumu prišle do Kućel. Onput još od Kućel do Rukavca, pak do Voloskega i Opatije.

Da njin ne bi bilo štufno, po pute su pod bremenon za zdolu i prez njega za zgoru, plele kalceti, al ča takovega. Tako su mlekarice hodile leta i zimi pletuć , ćakulajuć, a kad su bile posebno dobre voji, bi bile i zakantale. Kad su prišle va grad su zele lati v ruki i od vrat do vrat hodile, dokle nisu raspačale so mleko. Kad su regulale, kupile su ča njin je rabilo za kuću i šle brzo nazad doma. Hodile su po lepen i grden vremene, po lete i po zime. Za daž su imele jenu velu lumbrel, ka se j’ zvala “lumbrel od kofi”. Kad se j’ otprla, pokrila j’ su kofu i mlekaricu. Po zime j’ bilo najteže po snege i lede. Morale su brižne si opanki obavit z rutami al’ staremi kalcetami, da njin se ne drsi.

Milk Can, Gerbera, Flowers, White, Straw

Mlekarice su kofu nosile na hrpte vezanu z plašćanicun, a pod kofu se j’ moralo okole pasa ča podložit, da kofa ne tišći i ne nažlinja kožu. Mleko se ni mlekarice plaćalo saki dan, lego na kraj meseca al’ na kraj šetemani, kako su se već dogovorile z judi ken su nosile.

Čul san povedat da j’ jena zvonejska mlekarica svojni natrapala va jedan hotel, a nutre su se po zide bila vela zrcala. Videla se j’ va jenen zrcale onako oprćena z košon, a kako se brižna nikad ni na tako velen zrcale videla, ni samu sebe prepoznala, nego j ‘ mislela da njoj je to suseda Marija. Strašno se j’ načudila da j’ Marija tu, pak je na vas glas rekla: Tako Marija, za ime Božje, ča i ti si tu!”

Neke mlekarice na pute za v Opatiju fermale su se pul Pobar z jenen zogaron ki j’ delal na ceste i š njin poćakulale. Zogar je imel okole pedeset let. Jena mej njimi da ga j’ pitala koliko let ima. Odgovoril njoj je da ima dvajset i pet. Ona se j’ začudila i mu j’ rekla:”Va ime Božje, Vi me imate za bedastu. Kakoveh dvajset i pet let, kad ste već star? Čovek njoj je pak odgovoril: “Zač Vas iman za bedastu, tr Vi ste me pitala samo za leta, a ne i za zimi.”

Franjo Šepić-Bertin “Štorije od Rukavca, Kućel i šire okolice”